WENGER AIKOSEA HESHIMA DORTMUND

Klabu ya Borussia Dortmund kupitia mkurugenzi wao wa michezo Michael Zorc imesema kocha wa klabu ya Arsenal Arsene Wenger ''ameikosea heshima''klabu hiyo kwa kuzungumza hadharani kuhusu mchezaji Pierre-Emerick Aubameyang Raia wa Gabon.

Klabu ya Arsenal ina hamu ya kumsajili mshambuliaji huyo kwa dau la £60m, ambapo Siku ya Alhamisi , Wenger alisema kuwa Aubameyang ataifaa sana Arsenal , matamshi ambayo hayakuifurahisha klabu ya Dortmund.

''Tunahisi kwamba ni kukosa heshima kwa Wenger kuzungumzia kuhusu wachezaji wa klabu nyingine hatujawasiliana na Arsenal'', alisema Zorc.

Aubameyang ameadhibiwa mara mbili kwa utovu wa nidhamu msimu huu na alikosa mechi ya Jumapili ya sare ya 0-0 dhidi ya Wolfsburg baada ya kukosa kuhudhuria mkutano wa timu.

Mchezaji huyo mwenye umri wa miaka 28 ni mfungaji wa mabao mengi katika timu hiyo msimu huu baada ya kufunga mabao 13 katika mechi 15.

Dortmund ni ya nne katika ligi ya Bundesliga, wakiwa na alama 15 nyuma ya viongozi wa ligi Bayern Munich.