HAYA SASA YANGA MSHINDWE WENYEWE "MIHELA NJE NJE"

Katibu Mkuu wa Yanga Charles Boniface Mkwasa akisaini makubaliano ya mkataba na Mkurugenzi wa MACRON Tanzania Suleiman Karim wenye thamani ya shilingi Bilion 2 kwa ajili ya vifaa vya michezo uliotiwa saini leo Mbele ya waandishi wa habari Jijini Dar es Salaam.

Mabingwa watetezi wa ligi kuu soka Tanzania Bara klabu ya Yanga imeingia mkataba wa miaka mitatu na kampuni ya Macron wenye thamani ya Sh. Bilioni 2 kwa ajili ya utengenezaji na uuzaji wa jezi za klabu hiyo.

Akizungumza katika hafla ya kusaini mkataba huo katika makao makuu ya klabu yaliyopo makutano ya mitaa ya twiga na Jangwani, Dar es Salaam, Katibu Mkuu wa Yanga, Charles Boniphace Mkwasa “MASTER” amesema mkataba huo utakuwa na ongezeko kutokana na makubaliano waliyofikia. Kwa mujibu wa Mkwasa ni kwamba dau litakuwa likiongezeka kulinganana idadi ya mauzo ya jezi za mashabiki.

Ikumbukwe kuwa Desemba mwaka Jana 2017, Macron walisaini mkataba na miaka miwili na Shirikisho la Soka Tanzania (TFF) kwa udhamini wa jezi wa timu zote za taifa zikiwemo za vijana na wakubwa kwa wanawake na wanaume wenye thamani ya zaidi ya Sh. Milioni 800. 

Katika hatua nyingine, Afisa Habari wa Yanga, Dismas Ten amesema kikosi kipo tayari kwa mchezo wa Leo wa Ligi Kuu ya Vodacom Tanzania Bara dhidi ya Mwadui FC utakaoanza majira ya Saa 10:00 jioni kwenye uwanja wa Uhuru jijini Dar es Salaam.

Hata hivyo, Ten amesema katika mchezo wa leo klabu itaendelea kuwakosa Wazimbabwe, kiungo Thabani Kamusoko na mshambuliaji Donald Ngoma ambao ni majeruhi pamoja na Geofrey Mwashiuya, wakati Mzambia Obrey Chirwa akitumikia adhabu ya kufungiwa mechi tatu hadi sasa akiwa amekwishakosa mechi moja.

"Tunawachezaji wetu ambao bado ni wagonjwa kuna Ngoma, Mwashiuya na Kamusoko wataukosa mchezo wa Leo dhidi ya Mwadui pamoja na Chirwa ambaye anaitumikia adhabu iliyotolewa na Kamati ya Maadili,” alisema Dismas Ten.

Kuhusu, Mrundi Amissi Tambwe aliyekuwa anasumbuliwa na Malaria, Dismas amesema kwamba amepona, lakini kujumuishwa kwenye mchezo wa Leo ni mipango ya mwalimu.