CONTE AJIBU MAPIGO KWA MOURINHO BAADA YA KUMKATAZA KUSHANGILIA JANA

Antonio Conte anaamini kwamba hakufanya kosa lolote kuwahimiza mashabiki wa Chelsea kuwashngilia wachezaji wao baada ya kuwa mbele kwa mabao 4-0 dhidi ya Manchester United.

Conte alilipuka na kuwaamsha mashabiki wa Chelsea kuwashangilia wachezaji wao baada ya N'Golo Kante kufunga bao la nne hali iliyopelekea Mourinho kumnong'oneza kitu baada ya mchezo kumalizika akiashria kutofurahishwa na jambo lile.

Lakini Conte amesema wachezaji wake walistahili kufanyiwa mazuri na mashabiki wao kutokana na kile walichowafanyia jana.

"Nilikuwa nasikia tu kelele za mashabiki wa Manchester United wakiishangilia timu yao, na baada ya ushindi mnono kama huu, niliamua kuwaamsha mashabiki wetu kuwashangilia kutokana kiwango bora walichoonesha wachezaji uwanjani," alisema.

"Nadhani hili ni jambo la kawaida kabisa. Wachezaji wote wanastahili pongezi hizi.

"Kunapokuwa na mazungumzo ya siri, basi ni muhimu yabaki siri, ninamheshimu sana Jose, ni kocha mkubwa na amefanya mambo makubwa hapa," Conte aliiambia BBC.