CHINI YA KAPETI: ZOEZI LA KUMPATA MCHEZAJI BORA WA MWEZI SIMBA SC LAKAMILIKA...NI NANI?

ZOEZI la kumchagua Mchezaji Bora wa Mwezi wa Nane wa Klabu ya Simba limekamilika na Mshindi atatangazwa Mwishoni mwa Juma lijalo wakati Mnyama akimkabili Azam FC katika mechi ya Ligi kuu ya kandanda ya Tanzania Bara itakayopigwa Uwanja wa Taifa, Dar es salaam.

Taarifa za ndani ambazo MPENJA SPORTS imezinasa zinaeleza kuwa safari hii Simba watamtangaza kivingine Mchezaji wao Bora tofauti na walivyofanya huko nyuma ambapo huenda wakaandaa Hafla Maalum kama inavyotokea kwa klabu kubwa Barani Ulaya.

Ripoti zinadai kuwa Laudit Mavugo, Shiza Kichuya, Ibrahim Hajib, Mohamed Hussein 'Tshabalala', Jonas Mkude, Mzamiru Yassin, ni baadhi ya nyota wa Simba waliopo kwenye kinyang'anyiro hicho na mmoja wapo anapewa nafasi kubwa ya kushinda.

Msimu uliopita, Tshabalala, ambaye kwasasa anajiita Zimbwe Jr alishinda Tuzo ya Mchezaji Bora Chipukizi wa Ligi kuu Soka Tanzania Bara msimu wa 2015/2016 na ameanza msimu huu mpya kwa kuonesha kiwango cha juu, lakini kwasasa anakabiliwa na ushindani kutoka kwa Mastaa wengine wa Simba wanaowania tuzo ya Mwezi ya ndani ya Klabu.

Mchezaji Bora wa Simba anapatikana kwa kupigia kura kupitia Mitandao ya Kijamii ya Wekundu hao wa Msimbazi na kutuma Jina kwenda namba 15460.

Mchakato wa kuanza kumtafuta mchezaji Bora wa Mwezi Septemba unatarajia kuanza Jumatano ya Juma lijalo.

Mashabiki wa Simba na Wadau wa Soka ni fursa kwenu kupiga kura.....