SIMBA WAPANGA KUMREJESHA MUUAJI WA YANGA

PAMOJA na mkakati wa kusajili wachezaji wanne wa kigeni wenye ubora wa juu, Simba imepanga kumrejesha beki Miraj Adam.

Simba ilimtoa kwa mkopo beki huyo katika klabu za Mtibwa Sugar na Coastal Union ambapo alionyesha kiwango cha maana msimu huu wa Ligi Kuu Tanzania Bara.

Adam aliweza kuifungia timu yake mabao muhimu yaliyoipa ushindi Coastal kwenye michezo dhidi ya Yanga na Azam FC iliyochezwa kwenye Uwanja wa Mkwakwani, Tanga.

Mbali ya Adam, Wekundu hao pia wana mpango wa kumrejesha Miraji Othman ambaye walimtoa kwa mkopo katika klabu ya Toto African ya jijini Mwanza.

Mwenyekiti wa Kamati ya Usajili ya Simba, Zacharia Hanspoppe amesema kuwa watalazimika kuwarejesha wachezaji hao baada ya kuridhishwa na viwango vyao wakati wakicheza kwa mkopo.

“Hawa wachezaji wako kwenye  mipango yetu, tuna orodha ndefu ya majina ya wachezaji wetu ambayo tunaendelea kuipitia taratibu na kufanya uamuzi, lakini kwa sasa ambao tayari tumewapitisha Miraj na Othman,” Hanspoppe aliliambia Bingwa.

Hanspoppe alisema pia wako katika mchakato wa kumrejesha kundini aliyekuwa kipa wa timu ya Geita Golden ya Geita, Dennis Rihard ambaye alikuwa akiichezea timu hiyo kwa mkopo.

Kocha wa Simba, Jackson Mayanja ameutaka uongozi wa klabu hiyo kuhakikisha wanasajili wachezaji wenye uwezo wa kupambana na kuipa timu mafanikio.

“Kwa sasa Simba haihitaji wachezaji wa kujifunza, inahitaji wachezaji wenye uwezo wa kuleta matokeo,” alisema Mayanja.