RAIS WA FIFA GIANNI INFANTINO AIPONGEZA YANGA

Rais wa Fifa, Gianni Infantino ameipongeza Yanga kutokana na hatua iliyofikia ya kutwaa ubingwa wa Tanzania Bara.

Yanga imekuwa timu ya kwanza kutoka Tanzania kucheza hatua ya makundi au robo fainali ya michuano ya Kombe la Shirikisho iliyo chini ya Shirikisho la Soka la Afrika (Caf).

“Yanga ndiyo mabingwa wa Tanzania. Napenda kuchukua nafasi hii kuipongeza Young Africans na timu nzima isiyoshindika kwa mafanikio haya makubwa. Taji la Young Africans ni matokeo ya mshikamano ulioko ndani ya Young Africans,” amesema Infantino katika barua hiyo yenye kichwa cha habari kinachosema: Salamu za Pongezi kwa Young Africans.

Amesema pongezi zake ziende kwa uongozi wa klabu, makocha na benchi nzima la ufundi, wachezaji, madaktari pamoja na mashabiki wote wa Young Africans.

“Kwa niaba ya familia ya soka, napenda kuchukua nafasi hii kuishukuru Young Africans na Shirikisho la Soka Tanzania (TFF) kwa jinsi mnavyopeleka ujumbe chanya wa soka kwa jamii ya michezo,” alisema Infantino katika barua yake ya mei 18 ,2016 iliyotua TFF Mei 21, mwaka huu.