DEPAY AFURA BAADA YA KUENGULIWA KIKOSI CHA UNITED CHA FA

Memphis Depay ameingiwa na ghadhabu baada ya kupewa taarifa za kutojumuishwa kwenye kikosi cha Manchester United kitakachovaana na Crystal Palace kwenye fainali ya kombe la FA itakayochezwa leo katika uwanja wa Wembley. 

Depay ambaye alisajiliwa kutoka klabu ya PSV kwa ada ya paundi milioni 26, ameshindwa kabisa kuonesha uwezo wake, hali iliyosababisha kocha wake Louis van Gaal lumuengua katika kikosi chake katika mchezo wa leo.

Ameamua hata kutosafiri na kikosi cha timu hiyo na badala yake ameamua kuondoka peke yake kwa kutumia usafiri wake kuelekea nyumbani kwake.

Vyanzo mbalimbali vya karibu na mchezaji huyo vinaeleza kwamba, Memphis alikasirika sana hasa kutokana na kupewa taarifa hiyi uso kwa uso na kocha wake.

Katika michezo kumi ya mwisho ya ligi, Memphis ameanza michezo miwili tu dhidi ya Norwich City na Aston Villa .

Akiwa na PSV katika msimu wake wa mwisho, Memphis alifunga mabao 22 katika mechi 30 na kuipa ubingwa ikiwa na point 17 mbele ya wapinzani wao waliokuwa wakiwafuatia, lakini hali imekuwa tofauti baada ya kufunga mabao mawili tu katika ligi ya EPL msimu huu.