USIYOYAFAHAMU KUHUSU WACHEZAJI 10 BORA WA SOKA KWA WAKATI WOTE

Na Oswald Ngonyani

Mchezo wa mpira wa miguu maarufu kwa jina la soka bado umeendelea kuwa mchezo pendwa zaidi kuliko michezo yote inayochezwa juu ya uso wa dunia. Umaridadi wa wenye kuucheza mchezo huu ni miongoni mwa vitu vinavyopambiza kuwavutia wengi.

Kunako mchezo huu tayari historia kadha wa kadha zimekwishawekwa na kuandikwa. Mpaka leo hii kuna wachezaji ambao kwayo walikuwa gumzo na wameendelea kuwa gumzo tena na tena katika mawanda ya sasa ya usakataji wa ‘Gozi la ng’ombe’.

Wachezaji wafuatao wameendelea kuwa wa pekee zaidi katika historia ya mchezo wa soka duniani kote. Hii ni kutokana na makubwa waliyokuwa wamewahi kuyafanya ndani ya dimba lakini pia wanayoendelea kuyafanya mpaka sasa.

1 Edson Pele (1956-1977) – Brazil

Jina lake kamili ni Edson Arantes do Nascimento. Anashika nafasi ya kwanza katika orodha ya wachezaji bora wa mpira wa miguu duniani kuwahi kutokea. Alishinda Kombe la dunia mwaka 1958, 1962 na 1970 ni mchezaji pekee aliyewahi kushinda kombe la dunia mara tatu.

Akiwa uwanjani alikuwa mchezaji mwenye akili na kasi ya ajabu. Alikuwa ana uwezo mkubwa wa kukimbia na mpira na kufunga mabao. Takwimu zinaeleza kuwa alifunga mabao 1,000 katika kipindi chake cha kucheza mpira.

Heshima yake kwa sasa haielezeki. Amekuwa akialikwa katika matamasha makubwa ya michezo, hii ni kutokana na namna alivyokuwa ameifanyia makubwa tasnia ya mchezo wa soka na hata kuwazidi wachezaji wengine wote, katika nyakati zote.

2. Diego Armando Maradona (1976-1997)-Argentina

Ni mojawapo ya wachezaji waliokuwa na uwezo mkubwa wa kucheza na kuudhibiti mpira uwanjani. Alifunga goli la ushindi katika fainali ya kombe la dunia mwaka 1986 dhidi ya Uiengereza goli lililozua utata na kuitwa “Goli la mkono wa Mungu”

Hakuwa na nidhamu sana uwanjani na hata nje ya uwanja lakini uwezo wake mkubwa wa kutandaza kandanda dimbani unafahamika na wengi na atabaki katika kumbukumbu ya wengi sasa na hata siku zijazo.

3.  Lionel Messi -Argentina

Ijapokuwa ni mchezaji wa kizazi cha sasa, Muargentina huyu tayari amekwishafanya makubwa katika historia ya mchezo wa soka tangu ulipogunduliwa. Ndiye mchezaji bora mara nyingi zaidi wa dunia  akiitwaa tuzo hiyo mara nne na hata kuwazidi wachezaji wengine wote duniani.

Kwa kipindi kirefu sasa ameisaidia sana timu yake ya Barcelona kupata mafanikio makubwa ndani na nje ya Hispania huku akizidi kuendelea kuiletea tija klabu hiyo tena na tena. Alivunja rekodi ya Gerd Muller ya kufunga mabao 91 katika msimu mmoja mwaka 2012.

Messi ndiye mchezaji pekee aliyewahi kuwa mfungaji bora katika Ligi ya Washindi Ulaya mara 4 mfululizo. Mbali na sifa zote hizo, Messi ndiye Mchezaji kijana kufunga mabao 200 katika ligi ya Hispania-La liga.

Mpaka sasa, Lionel Messi anashikilia rekodi ya kuwa Mfungaji bora wa wakati wote wa klabu yake ya Bcrcelona katika mechi rasmi za klabu yake hiyo. Nidhamu yake ya hali ya juu katika soka inamfanya aendelee kuwa juu ya wengine na hata kujikuta akizidi kukumbukwa zaidi.

4. Johan Cruyff (1964-1984)-Uholanzi

Mdachi aliyeichezea Ajax na Barcelona katika miaka ya 60 na 70. Alijulikana kama mchezaji bora wa ulaya wakati huo. Alikuwa mahiri zaidi katika mfumo wa “Total Football” ambapo wachezaji wanabadirishana nafasi wakati wa kupeana pasi na kuwafanya wachezaji wote wa timu kushiriki.

Alipata tuzo 3 za mchezaji bora wa ulaya na kushinda vikombe 8 akiwa na klabu yake hiyo ya Ajax.

5. Franz Beckenbauer (1964-1984)-Ujerumani

Aliichezea kwa mafanikio makubwa klabu ya Bayern Munich ambapo akiwa klabuni hapo alifanikiwa kushinda taji la Ligi Kuu ya nchini humo (Bundesliga) mara tano na kombe la ulaya mara tatu. Alikuwa na uwezo wa kucheza nafasi nyingi uwanjani hasa nafasi ya ulinzi na ushambuliaji.

6. Alfredo Di Stéfano (1943-1966) – Argentina/Hispania

Alifunga mabao katika mashindano ya ulaya mara tano mfululizo. Alichezea klabu ya Real Madrid katika miaka ya 50 na kuwika sana.

7. Ferenc Puskás (1944-1966) -Hungaria

Mojawapo ya wafungaji bora wa magoli kuwahi kutokea duniani ijapokuwa hajulikani sana kwa wengi. Alikuwa na wastani wa angalau goli moja katika kila mechi aliyocheza.

Alikuwa mchezaji wa timu ya taifa Hungaria na klabu ya Real Madrid ya nchini Hispania. Alifunga magoli 7 katika fainali mbili za ubingwa barani ulaya.

8. Cristiano Ronaldo -Ureno

Ni mchezaji mwenye uwezo mkubwa wa kufunga mabao. Mwaka 2014 alitimiza mabao 400 akiwa na umri wa miaka 28 tu. Ana uwezo wa kumiliki mpira stamina na anajua goli lilipo. Ndiye mchezaji bora wa dunia kwa sasa akiwa ameitwaa tuzo hiyo katika awamu tatu tofauti, na anapewa nafasi ya kufanya hivyo zaidi kwa miaka ijayo.

Kwa sasa ndiye mpinzani nambari moja wa Lionel Messi. Inasemekana kuwa ukulu wao katika soka huenda ukawafanya wazidi kubadilishana katika kinyang’anyiro hicho cha tuzo za Ballon D’ Or kila mwaka. Kwa sasa anakipiga katika klabu ya Real Madrid ya nchini Hispania.

9. Zinedine Zidane ‘Zizzou’ -Ufaransa

Kwa wengi anajulikana kwa jina la ‘Babu’. Alistaafu kucheza kandanda mwaka 2006 mara baada ya tamati ya fainali za Kombe la dunia huku familia ya mchezo wa soka ikionekana kutoridhika kwani alistaafu akiwa bado na kiwango cha hali ya juu.

Alifunga magoli lukuki akiwa na Real Madrid na kuisaidia timu yake kufanya vizuri katika ligi na hata katika ubingwa wa ulaya. Kwa sasa ni miongoni mwa wahusika wa benchi la ufundi la klabu hiyo tajiri duniani.

10.Eusébio (1958-1978)-Ureno

Kwa kizungu aliitwa “The Black Panther” yaani “Paka Pori Mweusi” toka Ureno. Alizaliwa Msumbiji na kucheza soka nchini Ureno. Inasemekana kuwa kabla ya Cristiano Ronaldo (CR7) alitambulika kuwa mchezaji bora zaidi kuwahi kutokea nchini Ureno.

(0767 57 32 87)