TELELA; “ KAMUSOKO ANAJUA MPIRA UENDE WAPI NA WAKATI GANI, NIKIPATA NAFASI NAJUA NITAFANYA VIZURI…”

Na Baraka Mbolembole, Dar es Salaam.

Kiungo wa Yanga SC, Salum Telela amesema kuwa wanasubiri kuanza tu kwa ligi kuu msimu huu kwa kuwa kila mmoja klabuni yuko tayari kwa mapambano mapya ya kuhakikisha wanatetea taji lao katika msimu unaozamiwa kuwa mgumu.

 Mabingwa hao wa ligi kuu wataanza msimu wa 2015/16 siku mmoja baada ya michezo ya ufunguzi Septemba 13 kwa kuwavaa Coastal Union ya Tanga katika uwanja wa Taifa, Dar es Salaam.

Yanga iliishinda Azam FC kwa mikwaju ya penati na kutwaa kwa mara ya tatu mfululizo taji la Ngao ya Jamii, imefanya usajili mkubwa kwa kuongeza wachezaji kadhaa wapya kuziba nafasi zilizoachwa na wachezaji Kama, Jerry Tegete, Hussein Javu, Said Bahanunzi, Danny Mrwanda, Kpah Sherman, Said Dilunga, Mrisho Ngassa ambao walichangia asilimia kubwa ya ubingwa wa 25 msimu uliopo.

“ Tunasubiri tu kuanza kwa ligi, kila mtu yuko tayari kuanza msimu. Wachezaji wapya wameingia na wanaendelea kufanya vizuri ndiyo maana hata nafasi inakuwa ngumu. Ushindani wa namba unachochea makali ya timu” anasema Telela wakati nilipofanya naye mahojiano mafupi mapema Alhamis hii.

Mlinzi wa kushoto, Mwinyi Haji, kiungo Mzimbabwe, Kamusoko, Deus Kaseke, Peter Mwalyanzi, Donald Ngoma ni baadhi ya wachezaji wapya ambao tayari wameanza ‘ kuwashika’ mashabiki wa klabu. “ Kikosi chetu kwa sasa kipo imara zaidi. Nashukuru Mungu niko vizuri kwa sasa” asema Telela.

Kamusoko aligawa vizuri pasi, huku akikaba na kuisukuma timu mbele katika mchezo wake wa kwanza na alisimama imara tena kwa kujiamini na kufunga penati katika mchezo dhidi ya Azam FC wiki iliyopita na mchezaji huyo wa nafasi ya kiungo alicheza vizuri na kijana Said Makapu wakati Telela na Haruna Niyonzima wakiwa benchi.

“ Kamusoko yupo kwa kweli. Anajua mpira uende wapi kwa wakati gani. Ni Mtulivu sana akiwa uwanjani, ni vizuri kuwa na mtu huyu katika timu yetu.” . Akiwa amempa sifa mchezaji huo wa Zimbabwe, Telela kwa upande wake anachukuliaje ushindani uliopo katika eneo la kati mwa uwanjani katika timu yaoJe, ana hofu ya kupoteza nafasi yake?

“  Lazima niwe na hofu katika suala la kupata nafasi licha ya kuwa na uwezo wa kucheza nafasi tofauti tofauti. Katika timu kuna wachezaji bora. Kikubwa ni kushirikiana tupate matokeo bora. Kuhusu inshu ya kucheza, nikipata nafasi najua nitafanya vizuri”