TYSON NA KLITSCHKO KUZICHAPA MWEZI OKTOBA

Na Ramadhani Ngoda.

Wapenzi wa masumbwi ukimwenguni wanasubiri kwa hamu burudani nyingine ya mchezo huo baada ya kambi za mabondia Tyson Fury kutoka Uingereza na Wladmil Klitscko kutoka Ukraine kufikia makubaliano ya kupanda ulingoni ifikapo Oktoba mwaka huu.

Pambano hilo lilikuwa shakani kufanyika lakini baadaye mazungumzo yaliofanyika katika ofisi za chama cha soka ulimwenguni (WBA) Mjini Panama, yalikwenda vyema na hatimaye kufikia makubaliano na kisha kusaini mkataba kwa ajili ya pambano hilo linalotarajiwa kufanyika mjini Dusseldorf katika ardhi ya Ujerumani.

Klitschko anayeshikilia mataji 3 ya IBF, WBO na WBA kwa sasa, ametakiwa kutetea mataji yake dhidi ya Tyson Fury aliyepania kuteka nyoyo za wapenzi wa ndondi ulimwenguni siku ya pambano hilo.

Fury (26) hakusita kutamba kuelekea pambano hilo baada ya kuandika ujumbe kwenye ukurasa wake wa twita kuwa anakwenda kuwa bondia bora duniani katika uzito wa juu.

“Mfame anayekuja katika pambano hili kama mpiganaji bora wa uzito wa juu katika sayari hii,” alitamba Fury dhidi ya Klitschko.

Tambo hizo bado hazifanyi pambano hilo kuwa jepesi kwa mzawa huyo wa jiji la Manchester, kwani Klitschko hajapoteza pambano lolote (unbeaten) tangu mwaka 2004 ikiwa ni miaka 11 sasa jambo linaloongeza ladha ya pambano hilo.

Klitschko ambaye tarehe 5 Oktoba mwaka 2014 alimtwanga Mbulgaria aliyekuwa hajaonja kipigo kabla, Kubrat Pulev na kutwa ubingwa wa IBF, atapanda ulingoni dhidi ya Fury ambaye pambano lake la mwisho alilopanda ulingoni tarehe 28 Februari mwaka huu alimtwanga Christian Hummer.

Kutokana na wengi kuwa na shaka juu ya Fury kufanya kama alivyofanya David Haye aliyewahi kupangiwa kuzipiga naye na Haye kujitoa kwenye pambano na baadaye kustaafu kutokana na majeraha, Fury ameahidi kutofanya jambo kama hilo kwa lengo la kulinda heshima aliyonayo kwa wana masumbwi.

“Naahidi sitofanya kama David Haye. Nitampiga kwa KO (knock out) na wala msiwe na shaka juu ya hilo,” aliandika Fury kwenye ukurasa wake wa twita.