SIMBA SC WANAKAMUA ILE MBAYA HUKO ZENJI

Bila shaka sasa wamedhamiria kurudisha heshima yao iliyopotea kwa miaka mitatu baada ya kushindwa kushika nafasi mbili za juu na kujikuta wakikosa kuwakilisha nchi katika michuano mikubwa barani Afrika.

Katika miaka yote hiyo, Simba wamewaachia Yanga na Azam FC wakitamba anga za kimataifa.

kwa mara ya mwisho Simba kutwaa ubingwa ni mwaka 2012 chini ya kocha Mserbia, Milovan Circovic.

Msimu uliopita, Simba ilishika nafasi ya nne ikifundishwa na Goran Kopunovic, lakini msimu ujao inaonekana wamedhamiria kufanya vizuri.

Kwa muda wa wiki kadhaa waliweka kambi Lushoto, Tanga kabla ya kupanda Boti na kutua visiwani Zanzibar ambako wana utamaduni wa kwenda mara kwa mara.

Kikosi hicho kinaendelea kujifua uwanja wa Amaan Zanzibar chini ya Muingereza, Dylan Kerr ambaye dhahiri anaonekana kuwa na hamu ya kurudisha heshima ya Simba.