YANGA 'WAWASIMANGA' KIAINA SIMBA KUHUSU KAGAME CUP

Uongozi wa klabu ya Yanga umesema umeshapata barua ya uthibitisho wa ushiriki wao katika mashindano ya Kagame Cup kutoka CECAFA ambao ndio waandaji wa michuano ya hiyo inayoshirikisha vilabu bingwa  Afrika Mashariki na Kati.

Katibu mkuu wa Yanga Dkt. Jonas Tiboroha amesema, wao kama klabu walikuwa hawana uhakika wa kushiriki michuano hiyo kwasababu mwaka jana waliondolewa na walikuwa hawana hakika kama walifungiwa au la. Tiboroha ameongeza kuwa, tayari wamepokea barua kutoka CECAFA ikiwataka kushiriki michuano hiyo ya mwaka huu ambayo itafanyika jijini Dr es Salaam, Tanzania.

“Tuliandikiwa na TFF kwamba, tuthibitishe kushiriki na sisi tukawaandikia tukiomba maelekezo, kumbuka kwa mwaka jana tuliondolewa kwenye mashindano na tulikuwa hatuna uhakika kwamba tulifungiwa au la. Lakini bahati nzuri watu wa CECAFA, katibu mkuu wa CECAFA ametujibu na ametupa maelekezo mazuri kwahiyo sisi tutashiriki Kagame”, amesema Tiboroha.

“Ikumbukwe haya ni mashindano ya vilabu bingwa vya Afrika Mashariki na Kati. Hata barua niliyoandikiwa na katibu mkuu wa CECAFA inasema haya ni mashindano ya vilabu bingwa, kwahiyo timu inayoshiriki mashindano haya inatakiwa iwe na ‘status’ ya ubingwa, kama siyo bingwa ‘at least’ basi iwe mshindi wa pili”, amefafanua.

“Sasa ifike wakati tunapokuwa tunaandaa mashindano tufuate ‘regulations’ za mashindano kwasababu kanuni za mashindano zinasema CECAFA ni mashindano ya vilabu bingwa na si vinginevyo, sasa atakaekuwa anataka kushiriki lazima awe bingwa la sivyo unaondoa ladha ya mashindano”, ameongeza.

“Unapoleta kila timu kwenye mashindano unakuwa unaharibu ladha ya mashindano, hata timu waalikwa zinakuwa mabingwa kule kwao ndiyo maana CECAFA walikuwa na mpango wa kuialika TP Mazembe, TP Mazembe ni mabingwa kule kwao. Nasikia walikuwa wanataka kuialika timu nyingine kutoka Ghana ‘I don’t’ know’ ilikuwa ni timu gani, lakini ni mabingwa kule kwao. Ni kwamba wanapokuwa wanaalika timu, hawaaliki tu, wanaalika timu ambayo ni bingwa ili ilete kionjo tofauti cha ubingwa kutoka kwao tuangalie huku inakuwaje”, alimaliza.

Klabu ya Yanga tayari imeanza kufanya mazoezi kwenye uwanja wa kumbukumbu ya Karume uliopo kwenye ofisi za TFF Ilala, jijini Dar es Salaam ikiwa ni maandalizi kwa ajili ya michuano ya vilabu bingwa Afrika Mashariki na Kati maarufu kama Kagame ambayo itaanza kutimua vumbi mwazoni mwa mwezi Julai.