STRAIKA WA BONGO ANAYETIKISA ZESCO UNITED AFICHUA UTOFAUTI WA SOKA LA TANZANIA NA ZAMBIA

MSHAMBULIAJI wa kimataifa wa Tanzania anayecheza soka la kulipwa katika klabu ya Zesco United ya Zambia, Juma Liuzio Ndanda amesema timu nyingi za nchi hiyo zinamiliki viwanja binafsi na zinajali sana maslahi ya wachezaji tofauti na Tanzania.

Akizungumza na MPENJA BLOG kutoka Zambia, Liuzio ameongeza kuwa timu za Zambia zina udhamini wa mashirika mbalimbali yanayosababisha ushindani kuwa mkubwa zaidi.

“Utofauti wa Tanzania na Zambia ni mkubwa,  kwanza ukiangalia timu nyingi huku zinamiliki viwanja vyao binafsi na vizuri. Pia timu nyingi zinadhaminiwa na mashirika mbalimbali, kwahiyo vitu vingi vinakuwa rahisi kwao na ndio maana ushindani ni mkubwa tofauti na Bongo ambako kuna timu chache sana zenye ushindani”. Amesema Liuzio, mshambuliaji wa zamani wa Mtibwa Sugar.

Aidha, Straika huyo ambaye pia hujumuishwa mara kadhaa kwenye kikosi cha timu ya Taifa ya Tanzania, Taifa Stars, amefafanua kwamba viongozi wa Zambia wanajitahidi sana kufuata uweledi wa kazi.

 “ Kwa upande wa uongozi, kila kiongozi anacheza  part yake ya kazi, huwezi kusikia manager wa timu anampangia kocha kikosi na wanajali sana wachezaji wao hususani maslahi ya mchezaji binafsi”. Ameongeza Liuzio.

Kutokana na ushindani uliopo katika kikosi cha Zesco kilichojaa wachezaji wazawa na watano tu wa kigeni, Liuzio amesema jitihada binafsi ndizo zinamfanya apate namba kwenye kikosi cha kwanza kwa muda wote.

“Mimi kikubwa huwa nafanya mazoezi yangu binafsi tofauti na ya timu,  so muda mwingi nakuwa fit na pia napenda sana kumsikiliza kocha,  nafanya vile anavyoelekeza kwa jitihada zaidi”.

Luizio alianza kucheza soka katika timu ya Docks ya Morogoro , mwaka 2011 alichaguliwa timu ya mkoa wa Morogoro iliyoshiriki michuano ya  Taifa Cup na ndipo akasajiliwa na Polisi Moro ambapo alicheza ligi daraja la kwanza na kufanikiwa kupanda nayo ligi kuu, lakini akaachwa.

Baada ya hapo akasajiliwa na Mtibwa Sugar B mwaka 2012, lakini kutokana na kuonesha kiwango cha juu alipandishwa timu A ambapo alicheza ligi kuu Tanzania bara na baadaye kusajiliwa na Zesco.