SAKATA LA MESSI KUTIKISA KIKAO CHA KAMATI YA UTENDAJI SIMBA LEO....

BAADA ya Ramadhan Singano ‘Messi’ na Simba kukubaliana kuanza mazungumzo ya makubaliano mapya ya mkataba mpya utakaoanza katika msimu mpya wa 2015/16 kufuatia pande zote kutambua utata ulio ndani ya mikataba iliyokuwepo ambayo kimsingi iliingiwa kabla ya uongozi wa sasa wa Simba SC,  Wekundu wa Msimbazi bado wanahitaji kulijadili sakata hilo katika kikao cha kamati ya utendaji kitakachoketi leo.

Afisa habari wa Simba, Hajji Sunday Manara amesema kikao hicho kina agenda nyingi ikiwemo sakata la Singano na wanalijadili kwasababu halijaisha kama watu wengi wanavyodhani.

“Mimi nilikuwepo wakati Mwesigwa (Selestine) akitoa taarifa hii ya maazimio ya kikao na bahati nzuri kwenye kikao tulikuwa na mjumbe wa kamati ya utendaji bwana Collins (Frisch), naamini kikao kilienda vizuri”. Amesema Manara na kuongeza: “Nilichosikia katibu mkuu Mwesigwa akisema ni kwamba katika kipindi hiki, si vizuri pande zote mbili tukalizungumza hili jambo, namimi naheshimu sana mamlaka hizi. Unajua katika hali ya kawaida, ile kauli ilikuwa inanilenga mimi na inamlenga Singano na wawakilishi wake”.

“Lakini baada ya kile kikao nimezungumza na Rais wa klabu (Evans Aveva), nimezungumza na viongozi wa klabu, kesho (leo) kamati ya utendaji ya Simba inakutana, pamoja na kujadili mambo mengine yahusuyo klabu, tutalijadili jambo la Messi kwa mapana yake na kisha tutatoa maamuzi”.

Hata hivyo Manara amefafanua kuwa katika kikao hicho Singano hatakuwepo kwasababu si mjumbe wa kamati ya utendaji.

“Mchezaji Ramadhan Yahya Singano si mjumbe wa kamati ya utendaji, kikao hiki hakina agenda moja, ila agenda mojawapo itakuwa ni hii ishu  ya Singano. Simba inayo haki na kukaa, kwasababu kule tulikuwa na mwakilishi (Collins) lazima alete mrejesho wa kikao kwenye kamati ya utendaji na baadaye kamati itasema inachukuliaje mapendekezo ya TFF, kama ni kuridhia na kukaa na mchezaji ili kuzungumza naye au kivyovyote vile, jambo hili halijaisha kama watu wengi wanavyofikri”. Amesema Manara.