MSIMAMO WA REAL MADRID KUHUSU ISHU YA IKER CASILLAS NA GARETH BALE

Klabu ya Real Madrid ya nchini Hispania iko tayari kumuuza golikipa wao mkongwe Iker Casillas huku wakikaribia kumnasa golikipa wa Manchester United, David de Gea.

Miamba hiyo ya soka nchini Uhispania ina imani kuwa itampata golikipa David de Gea kutoka Manchester United na kwamba wako tayari kumuuza golikipa na nahodha wa klabu hiyo Iker Casillas kwa timu itakayokuwa tayari kutoa dau stahiki.

Iker Casillas anatarajia kuondoka klabuni hapo mara baada ya kujulishwa kuwa atakua golikipa namba 2 pindi usajili wa golikipa David de Gea utakapokamilika kutoka Manchester United.

Tetesi zinasema kuwa huenda kipa huyo akajiunga na klabu ya Tottenham Hotspurs ya jijini London kutokana na uwezekano mkubwa wa kipa wa Spurs kutimkia Manchester United inayojiandaa kuziba pengo la de Gea.

Inasemekana kuwa kipa Iker Casillas anataka kujiunga na ligi kuu nchini Uingereza na hasa jijini London, huku klabu ya Arsenal ikiwa pia inawania saini ya nahodha huyo wa Hispania lakini kutokana na ukweli kwamba klabu ya Arsenal inamuwania pia golikipa Peter Cech wa Chelsea, basi Casillas hawezi kuwa kipaumbele.

Real Madrid haina haraka ya kumtaka David de Gea lakini wana imani kuwa golikipa huyo atatua kwa mabingwa hao mara kumi wa Ulaya.

Wakati huo huo mchezaji ghali zaidi duniani, Gareth Bale amehakikishiwa nafasi yake na kocha mpya wa timu hiyo Rafa Benitez walipokutana wiki hii kabla ya mchezo wa timu yake ya taifa Wales walipocheza na Ubeligiji. Inasemekana kuwa Kocha huyo wa zamani wa Liverpool anatarajia kuijenga Real Madrid kupitia Gareth Bale.

Benitez alitaka kumuonesha Gareth Bale ni jinsi gani yeye ni muhimu katika mipango yake kabla ya kuanza kwa msimu mpya.

Benitez alitumia muda kumshawishi winga huyo wa zamani wa Tottenham Hotspurs umuhimu wake na jinsi gani atambadilisha kurudi katika uwezo wake wa juu aliokuwa nao zamani.