MOURINHO VITANI KUMPATA MRITHI WA CECH

Na Ramadhani Nngoda

Ni kama kata mti panda mti kwa Chelsea ya Jose Mourinho. Baada ya kubainika kuwa mlinda lango raia wa Jamhuri ya Czec, Petr Cech yu mbioni kuondoka Stanford Bridge, Jose Mourinho anatazamia kuingia Stoke City kumnyakuwa mlinda lango wa klabu hiyo Asmir Begovic na kumpeleka darajani.

Chelsea wamelazimika kuingia kwenye mazungumzo na Stoke kwa ajili ya kupata saini ya Begovic na kuhakikisha anakuwa kipa namba mbili wa 'blues' nyuma ya Mbelgiji Thibaut Courtois.

Cech mapema aliiambia Chelsea kuwa anataka kwenda Arsenal na kuna uwezekano mkubwa wa golikipa huyo kuichezea ‘The Gunners’ msimu ujao wa ligi unaotarajiwa kuanza mwezi wa nane mwaka huu.

Inafahamika kuwa Mourinho anataka kipa wa kiwango cha juu ili kutoa changamoto kwa Courtois kabla ya mabingwa hao watetezi wa Uingereza kuidhinisha safari ya Cech kwenda Arsenal.

Begovic ambaye pia anawaniwa na vilabu mbalimbali barani Ulaya ikiwemo Manchester United inayomuhitaji kama mbadala wa David De Gea anayetazamiwa kuelekea Real Mdrid muda wowote, amemvutia Jose Mourinho licha ya Mreno huyo kujua ugumu wa kupata saini yake kutokana na ukweli kuwa Begovic asingependa kuwa mkalia benchi bali kupata nafasi ya kikosi cha kwanza kama ilivyo Britania, lakini anaamini pesa inaweza kumshawishi mlinda lango huyo kumwaga wino ‘The Blues’

Chelsea wako tayari kumwachia Cech lakini kwa sharti la kupata mchezaji mmoja toka Arsenal.