"MKATABA WA MESSI HAUJACHAKACHULIWA"

Na Bertha Lumala, Dar es Salaam 

KLABU ya Simba imekanusha tuhuma za kuuchakachua mkataba wa winga wake, Ramadhani Singano 'Messi' kama anavyodai.

Akizungumza na waandishi wa habari kwenye Makao Makuu ya klabu hiyo yaliyopo Mtaa wa Msimbazi, Kariakoo jijini hapa jana mchana, Mkuu wa Idara ya Habari na Mawasiliano ya Simba, Hajji Manara, amesema klabu inatambua mkataba wa Messi wa miaka mitatu unaomalizika mwakani na si mwaka huu kama anavyodai winga huyo.

"Habari hizi ni upotoshwaji, Simba haijachezea mkataba wa Messi kutoka miaka miwili na kuwa mitatu, Messi ni mchezaji mdogo sana. Naambia hao mawakala uchwara, waache kumvuruga. Hii ndiyo staili yangu ya leo," amesema Manara.

"Tunaomba TFF (Shirikisho la Soka Tanzania) walitolee ufafanuzi suala hili badala ya kukaa kimya kwa sababu taswira ya Simba inachafuka," amesema zaidi Manara aliyeonekana kufura kwa hasira.