MAN UNITED WAZIDIWA KETE KWA MIRANDA

Na Ramadhani Ngoda.

Ile kauli ya ‘mwenye kisu kikali ndiye mwenye kula nyama’ inaonekana kutimia katika vita ya kuwania huduma ya mlinzi wa kati wa timu ya taifa ya Brazil na klabu ya Atletico Madrid, Joao Miranda ambaye amenyakuliwa na miamba ya Italia, International Milan baada ya vilabu hivyo viwili kukubaliana ada ya uhamisho ya pauni million 10.7 kwa ajili ya beki huyo.

Miranda aliyekuwa akiwaniwa na miamba kadhaa barani Ulaya ikiwemo Manchester United ya Uingereza, anatarajiwa kutambulishwa rasmi kama mchezaji wa Inter baada ya kumalizika kwa michuano ya Copa America inayoendelea nchini Chile akiiwakilisha timu yake ya taifa ya Brazil.

Inter Milan iliyo chini ya kocha Roberto Mancini ipo katika mchakato kabambe wa marekebisho ya kikosi chake kabla ya kuanza kwa msimu wa 2015/16 wa ligi kuu nchini Italia.

Taarifa hii inaonekana kuwa pigo kwa Lius Van Gaal ambaye alikuwa akimwania Miranda ili kuboresha safu yake ya ulinzi inayoonekana kusuasua tangu kuondoka kwa Nemanja Vidic na Rio Ferdinand katika klabu hiyo yenye maskani yake Old Trafford jijini Manchester.

Matumaini pekee ya Van Gaal katika nafasi hiyo yanabaki kwa beki wa Real Madrid Raphael Varane, Angelo Ogbonna (Juventus), Nicolas Otamendi anayekipiga katika klabu ya Valencia ya Hispania na mlinzi wa Borusia Dotmund Mats Hummels