MAAMUZI YA TFF SAKATA LA MESSI, TUZO ZA VPL NI UTHIBITISHO WA UOZO WA VIONGOZI WA SOKA TULIONAO

Na Shaffih Dauda

Namshukuru Mungu tumekutana tena Jumamosi ya pili tangu nianze kuandika makala katika gazeti hili bora la michezo nchini!

Juma hili kuna mambo makubwa mawili yametokea ambayo ni sakata la utata wa mkataba wa Ramadhan Singano ‘Messi’ na  Simba,  pamoja na tuzo za ligi kuu Tanzania bara 2014/2015.

Sakata la Singano na Simba limedhihirisha ‘magumashi’ ya TFF yaliyohitimishwa na tuzo za VPL. Wamefanya tukio la ajabu  kwa kuamua kuvunja mikataba ya pande mbili zinazoshindana kisheria.

Hoja ya msingi katika sakata la Singano ni mkataba mmoja kughushiwa,  kila upande unadai mkataba wake ni sahihi, lakini TFF wameamua kuvunja mikataba yote na kuwashauri kuanza majadiliano ya mkataba mpya, ingawa Simba wamekaidi  wakidai bado wana mkataba na Messi  mpaka  Julai 2016.

Mkataba wa miaka miwili alionao Messi alisaini Mei 1, 2013 na unatakiwa kumalizika Julai 1, 2015, wakati mkataba wa miaka mitatu walionao Simba na TFF ulisainiwa Mei 1, 2013 na utaisha  Julai 1, 2016. Je, mkataba wa miaka mitatu uliopo Simba na TFF na ule wa Singano wa miaka miwili umeandikwa na nani? Nani ameghushi? Kiu ya Watanzania ni kujua hilo.

TFF wameshindwa kuthibitisha mkataba upi ni sahihi, badala yake wanatumia busara kuifuta mikataba yote kwa madai kuwa ina utata. Kwanini wasiweke wazi mkataba sahihi na aliyeghushi afikishwe kwenye vyombo vya Sheria?.  TFF wameogopa kuathiri upande mmoja ambao labda wana maslahi nao, wanafunika kombe mwanaharamu apite.

Maamuzi haya ‘Bomu’  yamehitimishwa na  tuzo za ligi kuu zilizofanyika juzi. Sitazungumzia zawadi za mshindi wa kwanza mpaka wa nne, mwamuzi bora wala timu yenye nidhamu bora, nitajikita katika vipengele viwili vya Golikipa bora na kocha bora.

Magolikipa watatu waliotajwa kuwania  tuzo, Mohamed Yusuph (Tanzania Prisons), Said Mohamed (Mtibwa Sugar) na Shaban Kado (Coastal Union) hawamo Taifa Stars inayocheza dhidi ya  Misri kesho kuwania kufuzu fainali za mataifa ya Afrika, AFCON 2017, hii ni dalili tosha kuonesha kwamba tuzo hizi ni za kihuni tu!.

Kama TFF, bodi ya ligi na wadhamini Vodacom wanatuaminisha kuwa Yusuph, Said na Kado ndio makipa watatu bora, basi wanathibitisha kilio cha wadau wengi wa soka ambao wanasema uteuzi wa kocha Mart Nooij si sahihi.

Wachezaji wanaoitwa timu ya taifa ndio bora ligi kuu, lakini unataja magolikipa watatu ambao hawapo timu ya taifa, unamaanisha nini? Kwanini Aishi Manula, Mwadini Ali na Deogratius Munish waitwe timu ya taifa wakati wapo makipa wengine bora zaidi yao? . Ukiangalia kiundani, Ally Mustafa (Yanga) na  Aishi Manula (Azam) wamecheza mechi nyingi za ligi kwa mafanikio, lakini hawakutajwa kabisa, hii  ni sahihi?

TUZO YA KOCHA BORA

Makocha watatu waliowania tuzo, Goran Kopunovic (Simba), Hans van der Pluijm (Yanga) na Mbwana Makata (Prisons)  wote hawakuanza na timu, lakini najiuliza swali, kocha bora ni yule anayeiongoza timu kuchukua ubingwa au  anayeisaidia timu kutoshuka daraja?

Pluijm tangu awasili mwishoni mwa mwezi Desemba mwaka jana, ameiongoza Yanga katika mechi 20 za ligi kuu na sita za kimataifa. Ameshinda mechi 14 za ligi kuu, sare  tatu na kufungwa 3 na akafanikiwa kutwaa ubingwa, ukija mechi sita za kimataifa, aliibuka kidedea kwenye mechi mbili, akatoa sare moja na kufungwa tatu.

Kopunovic aliyeanza kazi mwezi Januari mwaka huu, ameingoza Simba katika mechi 18 za ligi kuu, akishinda mechi 12, sare mbili na kupoteza mitanange minne, wakati kocha bora Mbwana Makata ameiongoza Prisons katika mechi 8 pekee za ligi kuu akishinda tatu, sare tatu na kufungwa mbili.

Ukiangalia takwimu hizi bila kuzingatia vigezo walivyoweka bodi ya ligi,  Hans Van der Pluijm ndiye kocha bora wa VPL. Cha ajabu kabisa! TFF wamebadilisha ligi ya Tanzania  kwamba,  ili uwe bora unatakiwa kuisaidia timu kutoshuka daraja na si kuipa timu ubingwa na kucheza kwa kiwango cha juu.

TUZO YA MCHEZAJI BORA

Mlinzi wa kati wa Azam fc, Paschal  Wawa, mshambuliaji wa Simba, Emmanuel Okwi hawawezi kukosekana kuwania tuzo, wametumia vigezo gani kuwaacha hawa?. Sina tatizo na Simon Msuva kushinda tuzo ya Mfungaji na mchezaji bora kwasababu alistahili, lakini nashangaa baadhi ya wachezaji kuachwa.

 Tuzo hizi zinaondoa heshima ya soka la Tanzania na hata mdhamini mwenyewe anachafuka kwasababu anapenda kudhamini kitu kinachompa sifa.

Nawatakieni wikiendi njema! Tukipewa uzima tukutane tena Jumamosi ijayo!

(MAKALA HII IMEHAMISHWA KUTOKA GAZETI LA MICHEZO LA CHAMPIONI JUMAMOSI)