AZAM KUTAFUTA MBINU ZA KUIPORA YANGA UBINGWA UGHAIBUNI

MAKAMU bingwa wa ligi kuu soka Tanzania bara, Azam fc wameanza mazoezi rasmi kujiandaa na msimu mpya wa ligi kuu 2015/2016 baada ya makocha wote kuwasili nchini.

Afisa Mtendaji mkuu wa Azam, Saady Kawemba ameuthibitishia mtandao huu kwamba wataalamu wao waliwasili Ijumaa iliyopita, Jumamosi wakafanya kikao na utawala na wakapata fursa ya kutembelea Uwanja wa Azam Complex kuona miundombinu iliyopo na jana wamewatambulisha rasmi kwa wachezaji.

“Wachezaji wamewatambua viongozi na makocha wao, kwakweli makocha wamekuwa na furaha kujiunga na timu hii na leo tumeanza rasmi mazoezi kuanzia saa mbili na nusu asubuhi”. Amesema Kawemba na kuongeza: “Kwasasa wachezaji wa timu ya wakubwa na wadogo wanafanya mazoezi pamoja kwasababu wachezaji 14 hawapo, wapo kwenye timu zao za taifa, watakaporejea tutaanza mazoezi ya kila timu kujitegemea”

Kawemba pia amegusia programu ya kocha, Stewart John Hall  aliyerejea kwa mara ya tatu kuifundisha Azam.

“Kutokana na kikao cha jana,  Mwalimu (Stewart) amesema kwa wiki nzima hii atatengeneza akili za wachezaji,  kwamba sasa tunaanza msimu mpya, wakati huo huo anaangalia ufiti wa mchezaji mmoja mmoja”.

“ Baada ya wiki moja tutaanza mazoezi rasmi kwaajili ya Kagame, mwalimu amesema michuano hiyo ni pre-season yetu ya kwanza, baada ya Kagame tutakuwa na pre-season ya pili ambapo itabidi timu itoke kwa takribani wiki tatu au nne kuweka kambi nje ya nchi, mipango inaendelea kujua ni wapi tutakwenda, itakapokuwa tayari tutasema”.

“Tutarudi nchini tarehe 9 mwezi wa nane kwaajili ya mechi ya ngao ya jamii ambapo itakuwa kati ya tarehe 15 na baada ya hapo tutaanza ligi Agosti 22”.