ANGEL DI MARIA AFUNGUKA KILICHOKOSEKANA KWENYE MAISHA YAKE YA SOKA.

Na Ramadhani Ngoda.

Winga wa kimataifa wa Argentina na Manchester United, Angel Di maria anayeitumikia Argentina katika michuano ya Copa America nchini Chile kwa sasa, ameweka wazi kuwa kushinda taji akiwa na timu ya taifa ya Argentina kutamfanya asahau mataji yote aliyoshinda akiwa na vilabu alivyowahi kuvitumikia katika maisha yake.

Di maria aliyeibuka nyota wa mchezo katika fainali ya ligi ya mabingwa barani Ulaya msimu wa 2013/2014 iliyoshuhudia Real madria ikitwaa taji la 10 (La Decima) la michuano hiyo, bado anaona anahitaji kushinda taji akiwa na jezi ya timu ya taifa kwani ni jambo la heshima na kubwa kwake kuliko chochote katika soka.

Angel Di maria (kulia) akiwa na wachezaji wenzake Sergio Ramos (katikati) na Pepe (kushoto) wakiwa na 'ndoo' ya ligi ya mabingwa walioshinda msimu wa 2013/2014 jijini Lisbon

“Nadhani ningeweka rehani kila kitu nilichoshinda katika maisha yangu ya soka kwa ajili ya kushinda kitu nikiwa na timu yangu ya taifa,” alisema Di maria.

Licha ya kushinda kombe la dunia kwa vijana chini ya miaka 20 (world cup U20) mwaka 2007 na kufunga goli la ushindi lililoipa Argentina chini ya umri wa miaka 23 medali ya dhahabu katika michuano ya Olympic iliyofanyika Beijing mwaka 2008, bado Angel Di maria hajaonja ladha ya taji akiwa na timu ya taifa ya wakubwa ya Argentina.

“Hakuna ufananisho. Kila kitu unachoweza kushinda katika klabu ni cha pekee. Kushinda ligi ya mabingwa ilikuwa ni jambo bora kuwahi kutokea kwenye maisha yangu, lakini sidhani kama kuna kitu kinaweza kufanana na mimi kushinda kitu na timu yangu ya taifa,” alisisitiza Di maria.

Di maria alikuwemo kwenye kikosi cha Argentina kilichoshiriki kombe la dunia nchini Brazil mwaka 2014 na kuambulia nafasi ya pili baada ya kuusaliti ubingwa kwa Ujerumani katika dakika za nyongeza licha ya yeye kutokuwepo kwenye mchezo huo wa fainali, lakini ilikuwa pigo kwake kama ilivyokuwa kwa Waargentina wengine.

“Mamilioni ya Waargentina walifurika  wengine wakilala kwenye mitaa Brazil. Wengi walikosa tiketi lakini hawakujali. Waliacha mamilioni ya vitu kuja kutona sisi na kutuunga mkono. Hatukuweza kushinda lakini tulionesha kila kitu uwanjani. Na ndio maana sioni cha kufananisha,” aliongeza winga huyo.

Di maria akishangilia goli katika michuano ya kombe la dunia 2014 nchini Brazil

Mbali na matamanio yake hayo, Di maria anajiona miongoni mwa watu wenye bahati duniani hususani katika mchezo wa soka kwa kucheza pamoja na miamba miwili ya soka duniani kwa sasa, Cristiano Ronaldo (Real Madrid) na Lionel Messi (Argentina)

“Nakosa maneno sahihi ya kulielezea hili. Nimecheza na watu wawili bora duniani kwa sasa, Leo (Lionel Messi) na Cristiano (Ronaldo). Nimekuwa na bahati kucheza na wachezaji wawili ambao bado wanapigania kuwa bora duniani. Ni kitu ambacho wachache wamekipata au asiwepo kabisa aliyekipata,” alimalizia Di maria.