MWAMBUSI AELEZA SABABU ZA KUCHEMSHA MSIMU HUU, ADAI ANGEIFUNGA YANGA TAIFA KAMA SI KADI NYEKUNDU!

TANZANIA Prisons wataikaribisha Mbeya City fc katika mchezo wa ligi kuu soka Tanzania bara utaopigwa kesho kuanzia saa 10:00 uwanja wa Sokoine jijini Mbeya.

Mbeya City waliopo nafasi ya nne kwa pointi 31 wanazihitaji pointi tatu ili kujiimarisha katika nafasi hiyo, wakati Prisons wanaoshika nafasi ya 12 wakijikusanyia pointi 25 wanataka ushindi ili kujiweka mazingira ya kutoshuka daraja.

Kocha  mkuu wa Mbeya City Juma Mwambusi amesema: “Tumejiandaa vizuri kesho kuhakikisha tunapata pointi tatu muhimu kesho”.

Kocha huyo pia ameeleza kwanini kikosi cha Mbeya City kimesuasua msimu huu tofauti na msimu uliopita ambao walimaliza ligi wakiwa nafasi ya tatu.

“kiujumla kila mtu anakuwa na changamoto zake kuanzia kwa utawala, mpaka wachezaji, unajua msimu uliopita tulifanya vizuri na kila mtu akawa anajiona yuko bora, katika maandalizi viongozi walijisahau, program ya mwalimu haikufuatwa kama zamani, walikuwa wanaona kama wana kikosi bora wakati kikosi bora lazima uwe na maandalizi makubwa sana “. Amesema Mwambusin na kuongeza: “Lakini tukakaa chini na kuona wachezaji ambao tunaweza kuwatoa na kuleta wachezaji wengine katika dirisha dogo na wamekuja kubadilisha hali ya kikosi”

KWANINI MBEYA CITY IMEKUWA MTEJA KWA YANGA?

Mwambusi anasema: “Mikakati yetu mikubwa ni kushinda, tuliweza kuwafunga Simba hapa na tungeweza kuwashinda hata Yanga kule Dar es salaam, lakini kama unavyojua tukicheza mchezo uwanja wa Taifa na Yanga lazima tupate kadi nyekundu, hii si sawa, tukibaki 11 kwa 11 tunaweza kufanya vizuri. Simba tumecheza nao hatujawahi kupata kadi nyekundu na tumeweza kuvuna pointi. Tunaangalia mbele na michezo hii ya mwisho waamuzi wawe makini”.

Hata hivyo Mbeya City msimu huu ilifungwa magoli 3-1 dhidi ya Yanga uwanja wa Sokoine ikiwa na wachezaji 11.