MICHUANO YA KIKAPU YA MAJIJI YA AFRIKA MASHIRIKI NA KATI YAENDELEA KUSHIKA KASI

 Michuano ya mpira wa kikapu ya majiji ya Afrika Mashariki na Kati (East & Central Africa Inter-Cities Basketball Championship) imeendelea tena leo kwenye uwanja wa ndani wa taifa kwa michezo minne kupigwa.

Mchezo wa kwanza ulizikutanisha timu ya Tanga dhidi ya Qardo ya Somalia mchezo ambao ulianza saa 6:00 mchana, timu ya Qardo imeendeleza ubabe kwa kuitandika timu ya Tanga kwa jumla ya vikapu 81 kwa 62 na huo unakuwa ni ushindi wa pili kwa upande wa Qardo baada ya jana kuibuka na ushindi kwenye mechi yao dhidi ya Mbeya.

Mchezo mwingine umepigwa majira ya saa 8:00 mchana ukizikutanisha timu za Nairobi ya Kenya dhidi ya Dar City (wanawake), Mchezo huo umemalizika kwa timu ya Dar City kukubali tena kipigo cha vikapu 83 kwa 42 kutoka kwa Nairobi. Dar City imepoteza mchezo wake wa pili baada ya jana kubugizwa jumla ya vikapu 76 kwa 61.

Mchezo uliopigwa saa 10:00 jioni ulizikutanisha timu zote za Tanzania ambapo Dar Stars ilikabiliana na Mbeya (wanaume) na mchezo huo kumalizika kwa Dar Stars kuitandika Mbeya kwa vikapu 88 kwa 46.

Saa 12:00 jioni ulichezwa mchezo wa kufunga dimba kwa siku ya leo, Cairo ya Misri ilichuana dhidi ya Mogadishu ya Somalia. Mogadishu ambao wanaonekana ndio vimbonde kwenye michuano hiyo, walikubali kichapo cha vikapu 114 kutoka kwa Cairo wakati wao walifunga vikapu 62.

Kesho michuano hiyo itaendelea kwa mechi nne ambapo kwa upande wa wanaume Dar City watapambana na Tanga, Mogadishu wao watamenyana na Mbeya wakati Dar Stars watawakabili Cairo. Kwa upande wa wanawake, Kampala City watakuwa na kibarua cha kuwavaa Nairobi.