KUMBE YANGA WANAMKUBALI SANA HUYU 'JAMAA'

Mkurugenzi mpya wa Bodi ya ligi kuu nchini, Boniface Wambura

BAADA ya Shirikisho la soka nchini Tanzania TFF kumteua Boniface Wambura Mgoyo kuwa Mkurugenzi mpya wa Bodi ya ligi kuu nchini (TPLB), klabu ya Yanga imepongeza uteuzi huo na kuahidi kutoa ushirikiano wote kwa kiongozi huyo.

Kabla ya uteuzi huo, Wambura alikuwa mkurugenzi wa mashindano wa TFF  na sasa ataanza kazi yake mpya kuanzia Juni mosi mwaka huu akirithi mikoba ya Silas Mwakibinga.

Wambura pia aliwahi kuwa Afisa habari wa TFF kabla ya kuwa Mkurugenzi wa mashindao na alifanya kazi hiyo kwa weledi mkubwa akijenga imani kubwa kwa TFF na wanamichezo kwa ujumla.

Mkuu wa Idara ya Habari na Mawasiliano wa Yanga, Jerry Muro amesema Wambura ni mtu mwenye uwezo na weledi wa hali ya juu katika kuendesha soka.

“Alipokuwa mkurugenzi wa mashindano wa TFF,  alikuwa anaelewa maana ya mashindano, alionesha uwezo na uweledi wa kutosha sana katika kuendesha mpira wetu wa miguu kwa mtindo wa kisasa”. Amesema Muro na kufafanua zaidi: “Yanga kilicho chetu ni bodi ya ligi, mpaka mimi nitundikwa faini ya milioni tano ni bodi ya ligi, kwa muda mrefu tangu aondoke Silas Mwakibinga tumeshuhudia bodi ya ligi iliyokuwa inaendeshwa kwa misingi ya ubabaishaji. Hili neno ubabaishaji ni miongoni mwa maneno ambayo yamenipa adhabu, na mimi nitarudia tena, Bodi ya ligi ilikuwa ikiendeshwa kwa misingi ya ubabaishaji, lakini sasa  Bodi ya ligi imepata mtu makini, mtu muelewa. Sisi kama Yanga tutaungana naye kwa jambo lolote ambalo atahitaji kutoka kwetu ili tuweze kuendeleza mpira wetu na kufikia kiwango cha kimataifa.

Kwa upande wake Wambura amesema anaichukulia nafasi hiyo mpya kama changamoto kwake, lakini anahitaji ushirikiano kutoka kwa wadau wote ili kuboresha utendaji wa chombo hicho muhimu.

“Kwanza nimeichukulia  nafasi hiyo kama changamoto, lakini kikubwa ni imani ambayo kamati ya utendaji ya TFF na Bodi ya ligi wameonesha juu yangu. Niahidi kwamba kikubwa ni ushirikiano ili kuhakikisha ligi kuu ya Vodacom, ligi daraja la kwanza zinakuwa bora zaidi, Pia ligi daraja la pili ipelekwe kwenye bodi na kuwa moja ya vichocheo vya maendeleo ya mpira wa miguu nchino” Amesema Wambura na kukiri. “Lazima tukubali kuwa huko tulikotoka tulikuwa nyuma zaidi na kadri tutakavyokwenda tutaimarika, mwanga unaonekana mbele, kikubwa ni uweledi tu, watu wanaamini zikiwemo hata klabu kuwa ligi ni mali ya bodi, lakini klabu zitambue kuwa wao ni wadau wakubwa na ligi ni mali yao, TFF na Bodi ni wasimamizi tu”.