USAJILI WA KIMATAIFA, YANGA 'SASA HII SIFA'......

Jerry Muro

MABINGWA wa ligi kuu soka Tanzania bara, Young Africans wamewasilisha mapendekezo Shirikisho la soka Tanzania TFF wakiomba kuongezewa idadi ya wachezaji wa kigeni mpaka kufikia nane (8).

Kwa mujibu wa kanuni ya sasa, klabu inaruhusiwa kusajili wachezaji watano (5) tu wa kimataifa, lakini klabu kubwa zinazowakilisha nchi kwa muda wa miaka mitatu sasa, Yanga na Azam zinalalamika kwamba idadi hiyo ni ndogo na imewanyima fursa ya kufanya vizuri kimataifa kwasababu ya kukosa wachezaji wengi wa kiwango cha kimataifa.

Mkuu wa Idara ya habari na Mawasiliano wa Yanga, Jerry Muro amesema tayari wana majina ya wachezaji 12 wa kimataifa, hivyo wanasubiri majibu ya mapendekezo yao kutoka TFF.

“Tunachelea kutaja idadi ya wachezaji wa kimataifa ambao tutawachukua mpaka sasa kwasababu tayari tulishaandika mapendekezo yetu kwenda Shirikisho la mpira wa miguu Tanzania TFF yakijumuisha mambo mengi likiwemo suala la usajili wa nyongeza ya wachezaji wa kimataifa’, Amesema Muro na kuongeza: “TFF, ijaribu kutusaidia  tuweze kupata nafasi ya kusajili wachezaji nane  wa kimataifa ili tuweze kujiandaa vizuri katika ushiriki wetu wa michuano ya klabu bingwa Afrika ambayo Yanga itawasikilisha nchi”.

Hata hivyo Yanga imesema kama itaambiwa iendelea na idadi ile ile ya wachezaji wa kigeni (watano) itabidi ikae chini kuangali ni akina nani watasajiliwa.

“Wakituambia tusajili wachezaji wale wale watano waliotupa fursa, basi sisi kama klabu tutalazimika kujibana. Tunao wachezaji takribani 12 ambao wamekuja kwetu na wengine tumewafuata,  wengine tulishakuwa nao kwasababu dirisha dogo mwaka jana lilikuwa limeshafungwa. Tunaangalia kama tunaweza kuwasajili wachezaji wote”. Amefafanua Muro .

Wakati huo huo, Muro ametamba kuwa: “Kwa mara ya kwanza katika historia ya Yanga tutasajili wachezaji ambao ni kiwango cha dunia ‘World Class Players’, wachezaji ambao hawatakuwa na shaka yoyote kuthibitisha ubora wao kama tulivyofanya kwa wachezaji wa ndani mfano Kaseke (Deus). Yeye toka ligi inaanza waandishi na wachambuzi wa michezo wamesema miongoni mwa wachezaji ambao Tanzania tunao kama lulu na ni hazina kwa taifa ni Deus Kaseke pamoja na  wengine ambao hivi punde tutamalizana nao”.