KESHO NDIO KESHO MKUTANO MKUU WA TOTO AFRICANS

Wanachama wa timu ya soka ya Toto Africans ya Mwanza kesho tarehe tatu mwezi tano wanatarajia kufanya mkutano wao mkuu jijini humo.

Mkutano huo ambao umeitishwa na wanachama ambao walikusanya saini hili kuushinikiza uongozi wa timu hiyo kuitisha mkutano wao kama katiba ya timu inavyotaka.

Kwa mujibu wa katiba ya timu hiyo mkutano wa timu hiyo ulipaswa kufanyika toka mwishoni mwa mwezi wa tatu ama mwanzoni mwa mwezi wa nne lakini ukashindwa kufanyika.

Akizungumza na Mpenja blog,makamu mwenyekiti wa timu hiyo Ahmed Waziri Gao amesema kuwa mkutano ni haki ya wanachama ambao ndio wenye timu kwa hiyo uongozi hauna pingamizi kama taratibu zimefuatwa.

"Katiba yetu inatutaka tuwe na mkutano mkuu na sio timu yetu ni timu zote zinafanya hivyo kwahiyo wanachama wametumia haki yao ya msingi hivyo mkutano wetu utafanyika tarehe tatu mwezi huu pale shule ya msingi Nyamagana"Alisema Gao.

Aliongeza kuwa katiba ya timu inasema baada ya wanachama kuomba mkutano,mkutano utaitishwa baada ya ya wiki mbili.

"Katiba inasema hivyo wala si Mimi Gao kwamba baada ya kuomba mkutano,mkutano utafanyika baada ya wiki mbili na hilo liko wazi"

Kadhalika makamu mwenyekiti amezitaja baadhi ya agenda kuwa ni kujaza nafasi zilizoachwa wazi na mwenyekiti bwana Omary Mbalamwezi na wajumbe wa kamati ya utendaji ambao ni Gasper Mwanalelya na Godfrey Kyabula ambao wote walijiuzuru kwa nyakati tofauti.

"Hatutakuwa na uchaguzi kwenye mkutano huo ila tutakuwa tunajaza nafasi ambazo ziko wazi baada ya wenzetu wale kujiuzuru ,kwahiyo hakutakuwa na uchaguzi mpaka pale katiba yetu itakapofanyiwa marekebisho".Alifafanua
Kwa upande wa mwanachama ambaye alikuwa anakusanya sahihi hizo kutoka kwa wanachama wenzake aliyejitambulisha kwa jina la Salehe,Ameupongeza uongozi na kusema kuwa wao kama wanachama lengo lao ni zuri juu ya timu yao.

"Kama unavyojua timu yetu itashiriki ligi msimu ujao kwahiyo tunahitaji kupanga jinsi ya ushiriki wetu,kuna wajumbe na mwenyekiti wamejiondoa kwenye timu lazima tujaze nafasi zao timu haiwezi kuongozwa na wajumbe watatu tu na la mwisho tumeshiriki ligi daraja la kwanza mpaka tumepanda ligi kuu timu ilikuwa inatumia pia kupata pesa tunahitaji kupewa ufafanuzi wa vitu kama hivyo".Alizungumza Salehe.