KAULI YA DEUS KASEKE KUHUSU KUVAA VIATU VYA NGASSA HII HAPA....

Viatu vya Ngassa vigumu kurithi

KIUNGO mshambuliaji mpya wa Yanga aliyesajiliwa kutokea Mbeya City, Deus Kaseke amekiri wazi kuwa viatu vya Mrisho Ngassa ni vizito mno kurithi.

Akizungumza na waandishi wa habari jana baada ya kutambulishwa rasmi na Yanga katika mkutano uliofanyika  makao makuu ya klabu hiyo, Jangwani, Kariakoo Dar es salaam, Kaseke alisema atapambana kuziba pengo la Ngassa ambaye siku za karibuni ametimkia Free State Stars ya Afrika kusini akiwa mchezaji huru.

Kaseke akitambulishwa rasmi jana

“Namheshimu sana Mrisho Ngassa kwa jinsi anavyocheza na staili yake, kuvaa kiatu cha Ngassa au kucheza kwa staili yake ni vigumu, lakini nitapigana mwanzo mwisho ili niweze kuziba pengo lake”. Amesema Kaseke na kusisitiza: “Niwaambia kitu kimoja, nimetoka Mbeya City kuja hapa Yanga kwa lengo la kufanya kazi, nitajituma zaidi, nilipoishia nitaongeza ili mwalimu  aweze kunipa nafasi, sina mambo mengi naomba Mungu aniongeze katika hili”.

Kaseke ambaye ni pendekezo la kocha wa Yanga, Hans van der Pluijm pia amesema kujiunga Yanga ni nafasi kwake kuitwa timu ya taifa.

“Jinsi tulivyozoea, timu ya taifa hawaangalii sana timu za mikoani, naona nikifanya vizuri hapa Yanga, nitapata nafasi timu ya taifa”. Ameeleza Kaseke.