HII NDIO STORI YA WAARABU KUANGUSHA BONGE LA IBADA UWANJANI

Timu ya mpira wa kikapu ya Cairo kutoka Misri, jana ilikuwa kivutio kwenye uwanja wa ndani wa Taifa baada ya kuamua kufanya ibada uwanjani wakati wa mapumziko wa mechi yao ya nusu fainali dhidi ya timu ya Dar City ikiwa ni michuano ya mpira wa kikapu inayoshirikisha timu za majiji ya Afrika Mashariki na Kati.

Mchezo huo ulioanza majira ya saa 9:00 alasiri ulifika hatua ya mapumziko (half time) saa 10:00 jioni muda ambao hutumiwa na waumini wa dini ya Kiislam kwa ajili ya kufanya ibada (alasiri). Baada mwamuzi wa mchezo kupuliza filimbi kuashiria mapumziko, wachezaji wa timu ya Cairo walikusanyika pamoja na kufanya ibada uwanjani.

Kitendo cha wachezaji hao kufanya ibada uwanjani kilionekana kuvuta hisia za mashabiki wengi wa mchezo wa kikapu waliojitokeza kushuhudia pambano hilo. Imekuwa kama utaratibu wa wachezaji wa kiarabu kufanya ibada viwanjani, kwani mara kadhaa wameshuhutidiwa baadhi ya wachezaji wa Kiarabu hasa wa soka kushangilia kwa kusujudu pale wanapofunga magoli.

Timu ya Cairo ilifanikiwa kuibuka na ushindi kwa kuichapa timu ya Dar City kwa jumla ya vikapu 92 kwa 60 na kutinga hatua ya fainali ambapo watakutana na timu ya Qardho kutoka Somalia. Cairo ambao ndio mabingwa watetezi wa kombe hilo, wanapewa nafasi kubwa ya kufanya vizuri kwenye mchezo wa fainali na kulitetea kombe lao kutokana na mwenendo wao mzuri kwenye michuano hiyo ya siku tano.

Leo itapigwa fainali ya michuano hiyo kwa kuanza na mchezo wa mshindi wa tatu utakaopigwa majira ya saa 6:00 mchana ambapo Dar City itakuwa ikikabiliana na Dar Stars, saa 8:00 mchana itachezwa fainali ya wanawake ambapo Kampala City itapambana na Nairobi City wakati fainali ya wanaume itazikutanisha Cairo dhidi ya Qardho mchezo utakaopigwa saa 10:00 jioni.