EXLUSIVE: SIMULIZI YA KUSISIMUA KUHUSU MAISHA YA SOKA YA DEUS KASEKE NA JINSI SIMBA, YANGA WALIVYOPIGANIA SAINI YAKE!

Kaseke akisaini jana Yanga

MABINGWA wa ligi kuu soka Tanzania bara, Young Africans jana wamefanikiwa kumsainisha mkataba wa miaka miwili, aliyekuwa kiungo mshambuliaji wa Mbeya City fc, Deus Kaseke.

Kaseke ambaye kwa muda mrefu alikuwa anawindwa na Simba aliokuwa anafanya nao mazungumzo ya mara kwa mara alipata umaarufu mkubwa akiichezea Mbeya City msimu wa 2013/2014 na msimu wa 2014/2015 uliomalizika mei 9 mwaka huu.

Baada ya kusajiliwa na Yanga jana, Kaseke alialikwa katika kipindi cha michezo cha Sports Xtra kinachorushwa na Clouds fm kila siku saa 3:00 usiku.

Nyota huyo alizungumzia mambo mengi kuhusu maisha yake ya soka ikiwemo vita ya Simba na Yanga katika harakati za kuwania saini yake. Hapa chini ni baadhi ya mambo aliyoyasema Kaseke:

Swali: Watu wengi wanakujua Deus Kaseke ukicheza Mbeya City iliyotikisha nchi msimu wake wa kwanza 2013/2014, lakini hawajui historia yako ya soka, wafahamishe wadau wa michezo wakiwemo wapenzi wa Yanga njia ulizopitia kisoka.

Deus Kaseke anasimulia: “Nilianza kucheza mpira shule ya msingi na sikutarajia kama mpira utakuja kulipa. Kuna shule moja inaitwa Kalobe Sekondari, nikiwa kidato cha pili ndipo nilianza kucheza mpira shuleni  na mtaani mtaani, nikaaminiwa kwenye timu ya shule na kuchaguliwa kuwa waziri wa michezo 2008.

Baada ya kutoka hapo shule nikawa nacheza timu ya mtaani kwangu Nzovye inaitwa African Boys, baadaye nikaja kucheza klabu ya Simike FC na kusajiliwa na Airport Rangers. Nikiwa Airport kuna ‘Braza’ mmoja anaitwa Venas Mligo akanifanyia mpango,  nikaenda kucheza Mbaspo Academy (Mbeya).

Nikiwa hapo nikaenda mpaka Arusha kucheza Rolling Stone, nilivyorudi nikaona nitacheza mpaka lini mpira wa kituo?, nikaomba nitafute timu ligi daraja la kwanza.  Nakumbuka nikaenda kucheza Polisi Iringa, lakini kabla ya kwenda huko nilifanya usaili Prisons ambao waliniacha.

Nilipofika Polisi Iringa nilisajili bure kabisa, nikaona mkataba na kusainii tu kwasababu nilikuwa natafuta nafasi ya kutoka. Kuna kiongozi mmoja wa Polisi anaitwa Willy Chikweo,  akaniamba mdogo wangu hapa umekuja kucheza, unasaini tu, sisi hatuna hela. Kwasababu umekuja kucheza utatoka mwanangu. Nikamwambia hakuna tatizo,  nikafanikiwa kucheza pale na nilikuwa nacheza namba sita kwa mechi zote saba, lakini hatukufanikiwa kwenda kwenye kituo cha Morogoro . Nikarudi Mbeya sina hata mia, wazazi wangu wakaniuliza sasa mpira unakusaidia nini mwanetu?

Unajua mimi nilikuwa nasoma chuo cha ualimu, sisi familia yetu ni kubwa,  mzee wangu alikuwa ananilipia ada laki 5 au sita, nikamwambia mzee niache, wasomeshe wadogo zangu, mimi nitapambana.

Kitu kilichonifanya niache chuo ni Prisons. Waliniambia Deus utacheza hapa, njoo ufanya usaili, nikamwambia mzee mimi pale (Prisons) nitapata kazi, endelea kuwashughulikia wadogo zangu.

 Baba akaniacha na nikaenda Prisons,   lakini sikusajiliwa na ndipo nikaenda Polisi Iringa na kucheza kwa nusu msimu kwasababu nilienda raundi ya pili, lakini hatukufanikiwa kufika 9 bora ambayo walienda Mbeya City na msimu huo waliopanda ligi kuu walikuwa Prisons, Polisi Moro na Mgambo katika kituo cha Morogoro.  

Baada ya kupanda ligi kuu, Prisons wakasema lazima nikacheze pale, nikaenda kufanya usaili kwa mara ya pili, nilionekana kama napata nafasi, lakini wakasema utacheza timu ndogo. Nikawaambia haiwezekani bora waniache, nakumbuka kipindi kile Prisons waliwaacha wachezaji wengi walioipandisha timu.

Swali: Mchakato wa kujiunga Mbeya City fc ulikuwaje?

Deus Kaseke anaeleza: “Kipindi Maka Mwalwisyi anakwenda kuwa kocha msaidizi pale Mbeya City, nikampigia simu mwalimu Mwambusi (Juma) nikimuonba nifanye majaribio.  Mwalimu  (Mwambusi) yeye alijua mimi nacheza namba sita, akaniambia Deus namba sita imejaa, nikamwambia mimi sichezi namba sita, nataka kucheza namba za mbele, akaniambia basi poa. Ikabidi nianze kufanya usaili, ilikuwa unafika uwanjani, unafanya ‘warm-up’ halafu mnaingia kucheza timu mbili. Bahati nzuri mimi nikacheza vizuri na kuonesha  naweza kucheza Mbeya City na kwenye usaili huo nilikuwa nacheza namba 10, 7 na 11.

Baada ya kumaliza usaili, wakaniambia tutakupigia simu (Mbeya City), kweli  Mwambusi akanipigia simu akiniambia Deus uje mazoezini kesho asubuhi, lakini sikujua kama nimechaguliwa kucheza Mbeya City. Nikaenda mazoezini kesho yake, nikaenda tena kesho yake,  akaniambia Deus utaingia kambini. Sikuamini kama kweli nimechaguliwa kucheza Mbeya City ya daraja la kwanza. Sikuchukua hela yoyote pia katika usajili,  nilijua natafuta nafasi. Sasa kipindi tunapandisha timu ligi kuu,  mimi niliibuka mfungaji bora wa Mbeya City  nikifunga magoli manne.

Swali: Msimu wa kwanza wa Mbeya City (2013/2014), timu ilicheza vizuri na kushika nafasi ya tatu, lakini msimu wa 2014/2015 uliomalizika mei 9 mwaka huu, timu haikufanya vizuri licha ya kumaliza nafasi nne za juu, mlikumbwa na nini?

Deus Kaseke anaanika: “Unajua msimu wa kwanza tulipofanya vizuri, watu wakaanza kutufikiria kivingine. Kila mtu anawaza kwamba akikutana na Mbeya City anakutana na timu bora, kwakifupi hatukuwa na mpango B ‘Plan B’, tulicheza kwa staili ile ile ya msimu uliopita .

 Upinzani ukawa mkubwa, watu wakawa wanajiandaa kuliko sisi tulivyo, sisi hatukubadilisha staili ya uchezaji, ilitupa wakati mgumu mechi saba za kwanza, tulipoteza mechi nne mfululizo, ligi iliposimama tukashukuru kwasababu tuliona tunaweza kushuka daraja.

Baada ya ligi kusimama tukajipanga vizuri, lakini wachezaji ambao walikuwa tegemeo kwenye timu wengi wakaachwa, tukaanza wakati wa mpito tena. Sikuelewa kwanini wameachwa, sababu walikuwa nazo viongozi. Wachezaji tukaanza kuwaza kama wanaachwa wale ambao tulikuwa tunafanya nao kazi vizuri kama vile Saady Kipanga, Antony Matogolo (walitolewa kwa mkopo ), Deogratius Julius (aliachwa), tutafanyeji? Lakini tukajua viongozi  wanatafuta mchawi.

Tungekuwa pamoja na wale wenzetu tungefanya vizuri kwasababu tulikuwa tunajuana. Tulituliza akili baada ya kurudi  tuliamini kwamba hatuwezi kushuka daraja, hata watu walikuwa wananiuliza ‘Deus mtashuka daraja?.” nikawa nawaambia sisi tutashika nafasi nne za juu. Tulipofanikiwa nikawaambia mmeona?

Swali: Kwa muda mrefu ulikuwa unahusishwa kujiunga na Simba ingawa nao Yanga walikuwemo kwenye mbio hizo. Ulifanya  mazungumzo mara nyingi na Simba, lakini ghafla umesajiliwa na Yanga, vita ya klabu hizi kongwe  kuiwania saini yako ilikuwaje?

Deus Kaseke anasimulia:: “ Ujue toka mwanzo waliokuwa wananifuatilia sana ni Simba. Nilikuwa nafanya nao mazungumzo toka msimu wa kwanza, lakini hata Yanga walikuwa wananifuatilia, ila  Simba walikuwa ‘serious’ zaidi na nikajua naenda  kucheza Simba.

Baada ya kupoteza mechi nne za kwanza msimu uliokwisha na ligi kusimama tulipofika raundi ya saba, Simba wakaniita huku Dar, tukafanya mazungumzo ya awali, wao walikuwa wananihitaji kwa kipindi hiki ambacho nimesaini Yanga. Wakaniambia nitasaini mkataba mwezi wa 12, halafu inapofika mwezi wa sita mwaka huu nitamalizia ada yangu ya usajili.

Siku hiyo Yanga wakanitorosha usiku, nikaenda Hoteli moja, waling’ang’ania nisaini kipindi kile kile, nikawaambia Yanga niacheni kwanza nitakuja kusaini mwishoni mwa msimu.  Malengo yangu nilijua kufikia mwishoni mwa msimu mkataba wangu utakuwa umeisha, nilibishana nao (Yanga) mpaka wakamtuma kiongozi mmoja ambaye nilienda naye Mbeya, lakini nilipofika Mbeya nikaweka akilini mwangu kuwa kati ya timu hizi mbili (Simba na Yanga) lazima nitasaini timu moja.

Baada ya kumaliza mkataba Mbeya City, Yanga wakawa Serious kunitafuta, nikawa naongea na simu za Yanga tu. Simba wakanipigia simu wakiniambia hebu tutumie namba ya Peter Mwalyanzi, nikawatumia. Wao walitaka mimi na Peter twende Simba, kila nikipiga hesabu nikaona ngoja nitulie kwanza. Nakawaambia ngoja nimalize ligi, hata waandishi wa habari nilikuwa nawaambia mwenye kisu kikali ndiye atayekula nyama

Swali: Inaelezwa kwamba siku mbili kabla ya kusajiliwa Yanga, kulikuwa na vita ya hali ya juu kati ya Yanga na Simba, hebu simulia ilivyokuwa?

Deus Kaseke anafunguka: “Wakati natoka Mbeya nilijua naenda kusaini  Yanga kwasababu ndio walikuwa serious kwa siku mbili, tatu, napanda ndege Airport Mbeya napigiwa simu na viongozi wa Simba, Deus kumbe unakuja Dar? Unakuja kusaini Yanga?  Nikawaambia naenda kufanya nao mazungumzo, siendi kusaini.

Nafika Airport Dar kumbe kuna viongozi wa Yanga wamekaa pale, wakati huo huo napigiwa simu na viongozi wa Simba wakiniuliza uko wapi?, sisi tumeshafika Airport hapa?. Nikawaambia naenda kufanya mazungumzo tu na Yanga, siendi kusaini.

 Jana (juzi) nimepata taabu sana usiku, kuna watu ambao mimi siwajui walitumwa na Simba waje kunichukua hotelini na kunipeleka sehemu fulani tumalizane. Yanga wakashitukia, ikabidi waje Hotelini.  Mimi sikutaka kutoka pale Hotelini kwasababu hawakunileta wao, nikawaambia Simba ninyi ofa yenu mnasemaje? Mimi sijasaini Yanga.

Ilipofika saa sita usiku wakaja viongozi wa Yanga Hotelini, wakanipigia simu, nikawaambia mimi nalala, tutaongea kesho asubuhi. Moja ya viongozi wa Simba naye kanipigia simu akiniambia basi tutaongea kesho, lakini lazima tukuchukua hapo tukupeleke sehemu fulani.

Kumbe viongozi wa Yanga wanajua hizo taarifa, wakaja chumbani kuniambia  ofa yao, wakaa kikao na kuniambania Deus hapa inabidi tuhame. Tukakaa pale mpaka saa saba kasoro, wakasema hawawezi kulala mpaka mimi na wao tuondoke. Nikahamishiwa Hoteli moja pale Sinza inaitwa Golden Park, tulipofika pale bado simu za Simba zikawa zinapigwa, nikawaambia tutaongea kesho, nimelala, simu zikaendelea kupigwa,  ikabidi nizime simu ili niweze kulala.

Wakati nalala kumbe viongozi wa Yanga nao wamelala hotelini hapo, wanaogopa kwamba nitatoka. Sasa mimi naamka jamaa mmoja ananiambia, bwana Deus mimi nipo hapa toka usiku, nimelala chumba hiki kinachotazamana na chako, nilishindwa kukwambia kwamba nimelala hapa, nilitaka jamaa (Simba) wasifanikiwe kukutoa.

Lakini nilipokuwa nakuja Dar kusaini , watu wanaonisimamia waliniambia mwalimu Pluijm (Hans van der wa Yanga) ndiye aliyenipendekeza mimi kwamba “namhitaji Deus”. Nikawa najiuliza nitaendaje Simba wakati mwalimu ndio huyo anaondoka?  Nikienda Azam si ndio hao wanahangaika kutafuta kocha?

Azam nao walinipigia simu lakini hawakuwa Serious. Nilipofika hapa Dar si unajua watanzania tena, wakawa wanapandisha mzigo washindana wao kwa wao. Ikabidi niwaambie Yanga tukifika hapa (dau) hata aje nani sitasaini kokote. Wakafika dau nikasaini Young Africans miaka miwili.

Swali: Baada ya kusaini Yanga, nini matarajio yako?

Deus Kaseke: “Namuomba mwenyezi mungu aniepushe na majeraha ya uwanjani kwasababu ili ufanye kazi vizuri lazima uepukane na majeraha na mwenyezi Mungu ndiye anapanga kila kitu, nikiwa vizuri nitafanya kazi”.