BAADA YA YANGA KUMPOTEZEA, CHANONGO MAMBO YAKE BADO YAMENYOKA TU....

Chanongo (kushoto)

BAADA ya Yanga kuamua kuachana na mpango wa kujaribu kumsajili Haruna Chonongo, tayari nyota huyo amepata timu ya kuitumikia msimu ujao.

Chanongo aliyekuwa akicheza kwa mkopo Stand United akitokea Simba msimu uliopita, tayari ameshamaliza mkataba wake na Mnyama, hivyo sasa ni mchezaji huru.

Meneja wa Chanongo, Jamal Kisongo amesema mchezaji wake alishindwa kufikia makubaliano na Yanga kwasababu kuna vipengele havikuwa sawa katika mkataba.

"Kwanza niweke wazi kitu kimoja, lipo gazeti ambalo kidogo limepotosha, linasema Chanongo aliongeza dau, hapana! Chanongo na Yanga wamehitilafiana kwenye misingi ya vipengele vya utekelezaji wa makubaliano ya kimkataba". Amefafanua Kisongo.

Kisongo ambaye pia ni meneja wa mshambuliaji wa kimataifa wa TP Mazembe, Mbwana Samatta amesema tayari Chanongo ana timu ya kuichezea, kikubwa ni kusubiri wakati ufike ili atangaze.

"Ninachoweza kuzungumza ni kwamba Chanongo hana matatizo, tayari ana timu, wakati ukifika taarifa itatoka, ameshaafikiana na timu hiyo,  watatoa dau zuri tu. Katika timu hiyo ndio mahala ambapo yeye toka mwanzo alikuwa na fikira ya kutumika, huku kwingine ni kutafuta maslahi bora, lakini kimsingi timu anayo". Amesema Kisongo.