WANACHAMA SIMBA ALIPUA BOMU HADHARANI

Hawa ni wachanga?

AFISA habari wa Simba, Hajji Sunday Manara amepingwa kwa kauli yake anayotoa kuwa Simba ni timu changa hususani inapofungwa katika mechi za ligi kuu soka Tanzania bara.

Simba imefungwa mechi tano katika mechi 23 walizocheza mpaka sasa. Walianza kufungwa goli 1-0 dhidi ya Kagera Sugar uwanja wa Taifa, wakafungwa 2-1 dhidi ya Mbeya City uwanja wa Taifa, wakafungwa 1-0 na Stand United uwanja wa Kambarage, wakapoteza 2-0 dhidi ya Mgambo JKT uwanja wa Mkwakwani na juma lililopita walichapwa 2-0 na Mbeya City uwanja wa Sokoine.

Hajji Sunday Manara (kushoto), msemaji wa Simba SC

Mwanachama wa Simba, Ahmed Rashid Msahaba alipohojiwa na E fm jana alisema kauli ya Hajji kwamba ni Simba ni timu changa ni porojo tu na yeye anaikaa.

“Msemaji wetu Hajji Manara ni kijana wetu ambaye tunampenda, ni mwanachama mzuri, lakini kauli yake kwamba Simba tunafungwa eti kwasababu wachezaji wetu bado ni wachanga mimi nakataa’, Alisema Msabaha na kuongeza, “Tunaposhinda anakwambia timu yetu nzuri, tunapofungwa anasema timu changa, hivi ukichukua wachezaji wa Mbeya City, Ndanda, Stand United inatofautiana uwezo na Simba kweli? Simba ina uwezo kuliko timu zote hizo, hao wachezaji wa Simba wamechaguliwa mpaka timu ya taifa. Anaongea Porojo, timu ina wachezaji kutoka Uganda, anasema Simba haina uwezo, wao wameshindwa kuongoza timu kama tulivyotarajia”

“Tatizo lipo kwenye uongozi wa klabu ya Simba, wameshindwa, tumewachagua viongozi wale lakini uwezo wao ni  mdogo, angalau wangechagua kamati ambazo zingewasaidia kuliko kuchagua kamati kwa urafiki, kwasababu tu waliwapigia debe”.

Ukiangalia kiuhalisia, Simba ina wachezaji ambao hawajakaa pamoja kwa muda mrefu mfano, Danny Sserunkuma, Simon Sserunkuma, Juuko Mursheed ni Waganda waliosajiliwa kwa wakati mmoja, labda Emmanuel Okwi na Joseph Owino angalau wana wana uzoefu zaidi ya waganda wenzao.

Hata wachezaji wazawa wengi ni vijana wadogo ambapo wapo kwenye umri wa kuendelea kujifunza soka, hivyo ni rahisi kuwa na makosa ya hapa na pale. Mfano akina Manyika Peter, Said Ndema, Mohamed Hussein, Hassan Kessy, Jonas Mkude, Ibrahim Hajib.

Bahati mbaya zaidi Simba imekuwa na mabadiliko ya mara kwa mara ya makocha, hii imeleta athari ya moja kwa moja kwa vijana hawa.

Ukiangalia Yanga, Azam zina wachezaji waliokaa pamoja kwa muda mrefu kuliko Simba. Pia hawajabadili sana makocha ndani ya miaka mitatu iliyopita.

Angalia Simba kutoka Milovan Circovic wa mwaka 2012 wanachukua Ubingwa mpaka sasa wamepita mikononi mwa Patric Liewig, Abdallah Kibadeni, Zdravko Logarusic, Patrick Phiri na sasa Goran Kopunovic.

Lakini ukweli ni kwamba hata uongozi wa Simba chini ya Rais Evans Aveva hauko sawa hasa kwa kuendeleza migogoro inayoigawa timu wakati kauli yao inasema Simba Nguvu Moja.