TATHIMINI YANGA SC v RUVU SHOOTING KESHO, TWITE, CANNAVARO NJE, YONDANI NDANI!

Twite&Cannavaro nje, Yondani ndani kesho

Na Bertha Lumala, Dar es Salaam

'Ruvu Shooting Stars iliishika kwa kuilazimisha suluhu Yanga SC katika mechi ya mzunguko wa kwanza Uwanja wa Taifa jijini hapa Januari 18, mwaka huu.'

WAKATI beki wa kati wa Yanga Kelvin Yondani atarejea uwanjani, kikosi cha Wanajangwani hao kitawakosa nyota wengine watatu muhimu wakiwamo Mbuyu Twite na Nadir Haroub 'Cannavaro' katika mechi yao ya kesho dhidi ya Ruvu Shooting Stars jijini hapa.

Yanga SC ambayo inahitaji pointi sita kutwaa taji la 25 la Tanzania Bara, ina kibarua kigumu mbele ya maafande hao ambao katika mechi ya kwanza walikilazimisha kutoka suluhu kikosi cha Mdachi Hans van der Pluijm katika Uwanja wa Taifa Januari 18.

Kutokana na majeraha, Yondani, mchezaji bora wa Ligi Kuu ya Vodacom Tanzania Bara (VPL) msimu wa 2013/14, alikosa mechi iliyopita waliyoshinda kwa mbinde nyumbani 3-2 dhidi ya timu mpya VPL, Stand United ya Shinyanga katika Uwanja wa Taifa jijini hapa Jumanne.

Jerry Muro, Mkuu wa Idara ya Habari na Mawasiliano ya Yanga SC, ameuambia mtandao huu jijini hapa kuwa leo kuwa, Twite ambaye katika mechi iliyopita alicheza nafasi ya Yondani, hatakuwemo kikosini kesho kutokana na kuwa na kadi tatu za njano.

"Tutamkosa pia kiungo wetu Salum Telela ambaye bado anasumbuliwa na majeraha ya mguu aliyoyapata katika mechi yetu dhidi ya Mbeya City FC," amesema Muro.

Kocha mkuu wa Ruvu Shooting Stars, Tom Olaba, amesema kuwa wamepata mbinu ya kuizuia Yanga SC kupata mabao kesho.

"Ni mechi ya wanasoka na wanariadha hii. Yanga inapata mabao ya riadha kwa kubutua mipira na kukimbizana kupitia mawinga wa pembeni. Nimeandaa vijana wenye kasi kwa ajili ya kuwazuia mawinga hao," amesema Mkenya huyo.