TAMBWE APEWA MBINU ZA KUKWEPA ‘UNDAVA’

KOCHA msaidizi wa Yanga, Charles Boniface Mkwasa ‘Master’ amesema timu yao imefanya maandalizi ya kutosha kuikabili Ruvu Shootings ya Pwani katika mechi ya ligi kuu soka Tanzania bara inayopigwa leo jioni uwanja wa Taifa.

Mkwasa amekiri wazi kuwa Ruvu Shootings ni timu yenye wachezaji mahiri na nidhamu ya mchezo, hivyo walikaa chini kujiandaa kwa umakini.

“Tunacheza na Ruvu Shooting, timu ambayo ilitupa shida raundi ya kwanza na tulitoka nao suluhu. Ni timu yenye wachezaji mahiri  na nidhamu ya mchezo, tumejiandaa vizuri kuweza kuwakabili na kuhitaji ushindi” Amesema Mkwasa na kuongeza: “Tambwe (Amissi) ataongoza mashambulizi, hatuwezi kusema bayana mbinu tulizompa, lakini ana majukumu maalumu aliyopewa na tumemuelekeza nini cha kufanya dhidi ya mabeki wanaotumia nguvu wa Ruvu Shootings (Michael George Osei)”

Yanga wanaongoza ligi kuu wakiwa na pointi 49 baada ya kushuka dimbani mara 22, wakati Ruvu Shooting wao wako nafasi ya 5 wakijikusanyia pointi 29 kufuatia  kucheza mechi 23.

Mechi zilizopita, Yanga walishinda magoli 3-2 dhidi ya Stand United uwanja wa Taifa na wapinzani wao (Shooting) walishinda 2-1 dhidi ya Mgambo JKT, hivyo kila timu inaingia kwa nguvu ikichagizwa na ushindi waliopata.