POLISI MORO WAANZA KUSHIKANA 'UCHAWI' KIPIGO CHA JANA

KOCHA wa Polisi Morogoro John Tamba ametupiwa lawama na nahodha wa timu hiyo Nicolaus Kabipe kwa kuwaacha benchi baadhi ya wachezaji ambao wangeweza kushindana na Yanga jana uwanja wa Taifa akiwemo yeye.

“Makocha wetu bwana sijui wanawaza nini, hivi kwanini alituacha wengine? Tumewapa Yanga cha kusema, Si umeona nilivyoingia mimi, Nahoda Bakari tulibadilisha timu na kufunga goli moja? Ningekuwepo toka mwanzo ningewasumbua sana Yanga”. Ametamba Kabipe aliyekuwa chaguo la kwanza mbele ya kocha aliyetimuliwa Adolf Rishard.

Kabipe amesikitishwa sana na kipigo cha magoli 4-1 walichopata jana kutoka kwa Yanga na amesema sasa  matumaini ya kubaki ligi kuu dhahiri yamekwenda na maji.

“Tuna kazi ngumu ya kufanya dhidi ya Mbeya City katika mechi yetu ya mwisho, tunajua wenzetu (Mbeya City) wamepumua kwa matokeo ya mechi mbili zilizopita, tutaenda kupambana na kuona nini kitatokea”. Ameongeza Kabipe.

Wakati huo huo Mtandao huu ulimuuliza John Tamba kwanini aliwaacha benchi baadhi ya wachezaji akiwemo Kabipe?

Tamba alieleza kuwa kila mchezo una mpango wake, anapanga mchezaji kutokana na aina ya timu anayokutana nayo.

“Kubadilisha kikosi ni jambo la kawaida, sioni kitu cha ajabu. Kila mchezo una mpango wake, nilipanga kikosi kulingana na aina ya wapinzani wangu, kufungwa sio sababu ya kusema nilikosea kupanga timu” Amejitetea Tamba.