KADUGUDA AWASHUKIA VIONGOZI MATAJIRI WA MPIRA

Na Yahaya Mohamed….

Watu wengi ukiwauliza kuhusiana na ligi kuu ya msimu huu watakwambia ni moja kati ya ligi ngumu kutokea kutokana na msimamo wa ligi hiyo ilivyo.

Lakini pamoja na kutajwa kuwa na ushindani ligi hiyo imepoteza mvuto wa mashabiki katika uwanja wa Taifa jijini Dar  es salaam, uwanja uliokua unategemewa kwa mapato pindi timu ya Simba au Yanga zinapocheza na timu nyingine.

Kutoana na hali hiyo aliyewahi kuwa katibu mkuu wa FAT na klabu ya Simba Mwina Kaduguda ambaye hajawahi kukosa mchezo wowote uwanja wa Taifa labda akiwa kasafiri au anaumwa ametoa sababu za kupungua kwa mashabiki uwanjani.

Kaduguda amesema sababu kubwa ni kutofanya vizuri kwa moja ya vilabu vikubwa nchini (Simba Sc) hivyo mashabiki wake kukata tamaa.

“Simba haikuanza vizuri ligi nab ado haifanyi vizuri tofauti na Yanga ambayo haikuanza vizuri lakini badae imebadilika na inaongoza ligi hivi sasa” alisema.

Kadu anasema kuna timu zilianza vizuri sana ligi kama Mtibwa Sugar lakini zimebadilika na hazifanyi vizuri tena hali inayomfanya aione ligi hii kuwa yakawaida.

Kuhusu kuporomoka kwa vilabu vikubwa Kadu anasema ni kutokana na matajiri kuongoza timu za mpira.

Amesema tatizo kubwa ni watu kuamin kwamba pesa ni kila kitu na kila mwenye pesa anaweza kuongoza mpira kitu ambacho sio sahihi.

“hakuna tajiri anayeongoza mpira duniani, tumekua tukitolea mfano Ulaya sijui ni sababu ya upeo wetu mdogo…! Ulaya hakuna tajiri anayeongoza mpira bali wanamiliki timu ya mpira” alisema.

“Wamarekani wanaimiliki Manchester United lakini sio viongozi wa man u, Shekh Mansoor anaimiliki Manchester City si kiongozi wa city, Abramovich anaimiliki Chelsea sio kiongozi wa Chelsea, Luiz Short anaimiliki sunderland sio kiongozi wa mpira”

Ameongeza kwa kusema timu ya Simba na Yanga haziwahitaji matajiri bali zinahitaji fedha kwa sababu matajiri inafika sehemu wanakiuka misingi ya kuendesha mpira.

“Si kila panapohitaji mtaalum pesa inaweza ikafanya kazi kwa mfano siku Yanga inacheza na Etoile namna wachezaji walivyojipanga unajua tu Yanga imesajiliwa na viongozi Etoile imesajiliwa na kocha” amesema.

Hivyo ili mpira wetu usogee mbele wataalam wanatakiwa wapewe nafasi yao na matajiri wabaki kuwa wamiliki wa timu ya sio viongozi wa timu.