SIMBA YAANZA KUITAFUTIA 'GIA' KUBWA KAGERA SUGAR

WEKUNDU wa Msimbazi wanaanza mazoezi kesho jumatano kujiandaa na mechi ya ligi kuu itakayopigwa aprili 4 mwaka huu dhidi ya wenyeji Kagera Sugar uwanja wa CCM kambarage, Shinyanga.

Msemaji wa Simba, Hajji Manara ameuambia mtandao huu kuwa mazoezi hayo yatakuwa yanafanyika uwanja wa Chuo Kikuu Dar es salaam, (UDSM) asubuhi na jioni chini ya kocha mkuu Goran Kopunovic akisaidiwa na Seleman Matola na kocha wa makipa Adam Meja.

Simba haiko tayari kudondosha pointi nyingine uwanja wa Kambarage kwani walifungwa 1-0 na Stand United februari 22 mwaka huu.

Simba iliichapa Ruvu Shootings 3-0 katika mechi ya ligi kuu iliyopigwa mwishoni mwa wiki iliyopita uwanja wa Taifa Dar es salaam.

Mpaka sasa Mnyama anashika nafasi ya tatu kwa kujikusanyia pointi 32 katika mechi 20 alizoshuka dimbani.

Yanga wanaongoza wakiwa na pointi 37 baada ya kucheza mechi 18 wakifuatiwa na Azam fc wenye pointi 36 kufuatia kushuka dimbani mara 18.