SIMBA vs YANGA: WACHEZAJI WAFANYIENI KITU HII MASHABIKI

Na Oswald Ngonyani

Najua inasubiriwa na wengi, tena watu wengi mno. Itakuwa ni mechi ya ndani ya uwanja baada ya majigambo na mbwembwe nyingi za soka la nje ya Uwanja. Pengine utakuwa ni mchezo wa kumaliza ubishi katika mwanzo mpya wa mwaka 2015.

Wekundu wa Msimbazi wanaochagizwa na kauli mbiu ya NGUVU MOJA watakuwa wenyeji wa mahasimu wao wakubwa katika soka la bongo, Dar Young Africans a.ka. Wazee wa MBELE DAIMA, NYUMA MWIKO  katika mchezo namba 117 utakaopigwa kunako dimba la Taifa Jumapili hii.

Kuelekea mchezo huo kumekuwepo na sarakasi za kila namna sarakasi ambazo kwa kiasi kikubwa zimekwishatolewa ufafanuzi wa kina japo upande mmoja unaonekana kulaumu zaidi na kuona kama Uongozi  wa Ligi kupitia kwa Kaimu afisa Mtendaji mkuu wake Bi Fatma Abdallah ulikengeuka.

Sarakasi hizi zilianzia kunako maamuzi ya Uongozi wa Simba kumtumia mshambuliaji wao Ibrahim Hajib Migomba ambaye alikuwa mhanga wa kadi tatu za njano kabla ya kukutana na Tanzania Prisons katika mchezo wa wikiendi iliyopita.

Kuhusu sakata hilo tayari yamekwishazungumzwa mengi sana na baadhi ya wadau wa kandanda hapa nchini lakini mwisho wa siku Bodi ya Ligi ambayo ndiyo muamuzi wa mwisho pale inapotokea sintofahamu za namna hii imekwishaliweka wazi suala hilo.

Kwa mantiki hii ni kama kusema  Klabu ya Simba ilikuwa sahihi kumtumia mchezaji huyo, ambapo kwa mujibu wa TPLB Hajib hatacheza katika mechi dhidi ya Mtibwa lakini aliruhusiwa kucheza katika mechi dhidi ya Tanzania Prisons lakini pia atacheza dhidi ya Yanga Jumapili hii.

Si nia yangu kuendelea kuyazungumzia hayo kwa siku ya leo. Lengo la makala yangu haya ni kutaka kuuzungumzia mchezo wa Jumapili baina ya vilabu vikubwa katika historia ya soka la Tanzania, vilabu Kurwa na Doto, yaani Yanga (1935) na Simba (1936).

Ni mchezo ambao mara zote huongoza kwa kujaza mashabiki pale Taifa, ni mchezo ambao ndio kila kitu katika mawanda ya soka la Tanzania. Wakubwa, watoto, Wazee, na hata vijana huonekana kushikwa na shauku kubwa ya kuushuhudia mchezo huu, ni mchezo unaosubiriwa na watu wa rika na jinsia zote.

Siku zote matumaini ya wapenzi wengi wa kandanda hutegemea makubwa sana pale ambapo timu hizi hukutana. Wengi hutegemea soka ya ushindani kuonekana ndani ya dimba. Wengi hutegemea kiwango cha hali yajuu kuoneshwa na wachezaji wa timu husika. Kwa kifupi wengi hutegemea mambo yasiyo haba kutokelezea ndani ya dimba wakati wanaume hawa wanapopambana.

Wengi wetu hatutegemei kuuona mpira wa butua butua siku hiyo, ni wazi kuwa hatutategemea kuona ubabe na visa visivyomithilika ndani ya uwanja. Hapana shaka mimi na wewe tutapenda kuona kaulimbiu ya FIFA ya ‘FAIR PLAY’ ikipewa nafasi zaidi kuliko sintofahamu nyinginezo.

Tuna amini kila timu ina kikosi chenye wachezaji watakaokuwa chachu ya ushindi Jumapili. Achana na historia ya klabu hizo katika siku za usoni, ni wazi kuwa maandalizi yenye tija kwa kila timu lakini pia nidhamu ya wachezaji wa timu husika ni moja ya siri ya mafanikio ambayo timu fulani itaweza kupata matokeo.

Mpira si ugomvi, mpira si visa lakini pia mpira si lelemama. Wakati wenyeji wa mchezo huo, Timu ya soka ya Simba wakiwa visiwani Zanzibar kujiandaa na mtanange huo, watani wao wenyewe wapo Bagamoyo tayari kwa kujiweka sawa kunako mchezo huo.

Pamoja na kauli za mbwembwe za viongozi wa timu hizo, Bwana Jerry Muro kwa Yanga lakini pia Bwana  Iddi Kajuna kwa Simba, ni dakika 90 pekee ndizo zitakazotoa jawabu stahiki la nani ni nani katika mchezo huo.

Ikumbukwe kuwa Yanga wataingia katika mchezo huo wakiwa kileleni mwa VPL msimu huu 2014/2015 wakiwa na jumla ya pointi 31 baada ya kushuka dimbani mara 15 huku Simba wenyewe wakiendelea kubaki katika nafasi ya nne wakiwa na pointi 23 baada ya kucheza michezo 16.

Ni mchezo ambao ni wazi kuwa timu ya Yanga itahitaji ushindi zaidi ili kujiweka katika mazingira mazuri ya kutwaa ubingwa wa VPL kwa msimu huu baada ya kuukosa msimu uliopita 2013/2014.

Lakini pia ni mchezo ambao timu ya Simba itataka kuongeza idadi ya pointi ili angalau kuwapa morali mashabiki wake, mashabiki ambao kwa kiasi kikubwa wanaonekana kutokuwa na imani na timu yao japo katika mchezo wa mahasimu hawa lolote huweza kutokea.

Kiufundi, kila timu ina kikosi bora katika maana ya mchezaji mmoja mmoja, lakini pia kila timu ina walimu ambao kwa kiasi kikubwa wanaonekana kuwa na weledi wa kutosha katika mawanda ya mchezo wa mpira wa miguu. Ni wazi kuwa tutashuhudia mchezo utakaotawaliwa na ufundi wa hali ya juu zaidi tofauti na michezo mingineyo baina ya timu hizo siku za nyuma.

Ni matumaini yangu sheria 17 za FIFA zitafuatwa na kutekelezwa kinaganaga na marefarii watakaohudumu kunako mchezo huo ili kila timu iweze kukubaliana na kile kitakachopatikana baada ya mchezo kumalizika, yaani kuridhika na matokeo.

KUELEKEA MCHEZO WA SIMBA vs YANGA: WACHEZAJI WAWAPE RAHA MASHABIKI WAO KWA KUONESHA KANDANDA SAFI UWANJANI

Wasalaaaaam

(0767 57 32 87)