SIMBA KUINGIA CHIMBO RASMI KESHO

WEKUNDU wa Msimbazi Simba kesho wanaingia kambini jijini Dar es salaam kujiandaa na mechi ya mwishoni mwa wiki ijayo uwanja wa CCM Kambarage, Shinyanga dhidi ya Kagera Sugar.

Desemba 26 mwaka jana, Kagera Sugar iliitandika Simba bao 1-0 katika mechi ya ligi kuu iliyopigwa uwanja wa Taifa, Dar es salaam.

Msemaji wa Simba, Hajji Manara ameuambia mtandao huu kuwa baada ya mazoezi ya kesho asubuhi uwanja wa Chuo kikuu cha Dar es salaam (UDSM), kikosi kitaingia kambini moja kwa moja.

"Leo ni mapumziko kwa wachezaji wetu, kesho tutafanya mazoezi asubuhi na baada ya hapo tutaingia kambini moja kwa moja kujiwinda dhidi ya Kagera Sugar". Amesema Manara.

Mpaka sasa Simba wapo nafasi ya tatu kwa pointi 32 kibindoni baada ya kushuka dimba mara 20, pointi 8 mbele ya Vinara Yanga waliocheza mechi 19 na kuvuna pointi 40. Nafasi ya pili inashikiliwa na Azam fc wenye pointi 36 baada ya kucheza mechi 18.