OKWI KUREJESHA MABAO YA 'VIDEO' SIMBA SC

KIUNGO mshambuliaji wa Simba SC, Mganda, Emmanuel Anord Okwi anajipanga upya kurejesha utamu Msimbazi kwa kufunga magoli yake ya kwenye video.

Siku za karibuni, Okwi amekuwa akifunga magoli matamu ya mbali na alifanya hivyo dhidi ya Azam fc katika sare ya 1-1, dhidi ya Yanga na Mtibwa Sugar, Simba ikishinda 1-0.

Mechi ambayo Simba walifungwa 2-0 na Mgambo JKT Mkwakwani Tanga na Simba waliposhinda 3-0 dhidi ya Ruvu Shootings, Okwi hakufanikiwa kufunga goli na alipoteza nafasi nyingi muhimu katika mechi hizo.

Hali hiyo ilimlazimu kocha mkuu kumtoa dakika za 70 na ushee katika mechi hizo mbili.

Mechi dhidi ya Ruvu Shootings, Okwi alipiga shuti moja la mbali, lakini likagonga kona ya mwamba wa juu wa kulia na kuingia uwanjani. Kama angefunga lingekuwa bao lingine la kwenye video.

Akizungumza na mtandao huu, Okwi amesema ni kweli ameshindwa kung'ara mechi mbili mfululizo, lakini anakuja na moto mpya kuelekea Kambarage, Shinyanga ambako watachuana na Kagera Sugar katika mechi ya ligi itayopigwa aprili 4 mwaka huu.

"Mimi siku zote ni mpambanaji, nafahamu kwenye mpira kuna kupanda na kushuka, hakuna anayependa kushuka, nikikosea nakaa chini na kutafakari cha kufanya, nimeendelea na mazoezi ya kufunga kwa ufundi na nitafanya hivyo mechi ijayo". Amesema Okwi.

"Namshukuru Mungu na wachezaji wenzangu, wananitia moyo sana na kwa pamoja tutapambana kushika nafasi za juu".

Simba ipo nafasi ya tatu kwa kujikusanyia pointi 32 kwa kucheza mechi 20.

Desemba 26 mwaka jana, Simba walifungwa 1-0 na Kagera Sugar na wanakwenda kulipa kisasi huko Shinyanga.