JOSE MOURINHO KUMNASA ADEBAYOR MWISHO WA MSIMU

Meneja wa Chelsea Jose Mourinho anaweza kumchukua Straika wa Tottenham na timu ya taifa ya Togo Emmanuel Adebayor kwa Mkopo kwa ajili ya Msimu ujao.

Gazeti la Uingereza Daily Mirror limeripoti kuwa Mourinho anamtaka Adebayor Stamford Bridge ili kuchukua nafasi ya Didier Drogba ambae anatafakari kustaafu mwishoni mwa Msimu.

Mourinho anahitaji Straika wa 3 wa akiba ili kuchukua nafasi za Diego Costa na Loic Remy endapo wataumia au kufungiwa.

Ikiwa Adebayor atatua Chelsea hii itakuwa mara ya pili kwake na Mourinho kuungana kwani Miaka Minne iliyopita Mourinho akiwa Real Madrid alimchukua Adebayor kwa Mkopo kuziba pengo la Majeruhi Gonzalo Higuain na huko Straika huyo aling'ara na kufunga Bao 8 katika Mechi 22.

Hivi sasa Adebayor mwenye umri wa Miaka 31, hana namba katika kikosi cha Spurs iliyo chini ya Meneja Mauricio Pochettino.