ETI YANGA KUIFUNGA SIMBA KESHO!!!!!!!!!!!

Na Frank M Mgunga

Mshambuliaji wa zamani wa klabu ya Simba Zamoyoni Mogella, amelizungumzia pambano la Jumapili la watani wa jadi Simba na Yanga na kuipa Yanga nafasi kubwa ya kushinda mchezo huo kutokana na uimara pamoja na matokeo yao katika mechi za siku za karibuni.

Mogella aliyetamba na kikosi cha Simba miaka ya 80 ameiambia Mpenja Blog, haipi nafasi kubwa ya timu yake ya zamani kushinda mchezo huo kutokana na timu waliyokuwa nayo pamoja na ubovu wa viongozi wanayoiongoza timu hiyo kwa sasa.

“Yanga wananafasi kubwa ya kushinda mchezo wa Jumapili labda wenyewe wafanye uzembe lakini kwa uimara wa timu yao Simba hawawezi kuzuia wasipate kipigo kwanza timu yao haina mwendelezo kila siku naona inamabadiliko lakini kitu kingine migogoro imezidi viongozi wenye kwa wenyewe hawaelewani,’amesema Mogella.

Mogella anasema anayakumbuka mambo mengi wakati timu yake inapokutana na Yanga miaka hiyo na namna ushindani unavyokuwepo kwa pande zote mbili japo baada yamchezo huo wachezaji huwa marafiki

Mogella aliyepewa jina la ‘Golden Boy’ na mashabiki wa Simba kutokana na kumtesa beki wa Yanga Athuma Juma Chama anasema wakati huo alikuwa nahakikisha anapambana na kuifungia bao timu yake ili kuonyesha uwezo wake anapokuwa uwanjani.

“Nakumbuka mwaka 1983 tulicheza na Yanga na kutoka sare ya 1-1 wakati huo nilikuwa rafiki sana na kipa wa Yanga Steven Nemes lakini tulipokutana katika mchezo huo tulikuwa kama hatujuani na niliisawazishia timu yangu bao baada ya Abed Mziba kuifungia Yanga bao la kuongoza,’amesema Mogella

Mkongwe huyo amesema ili Simba iweze kuifunga Yanga inatakiwa kuanza kuimarisha kikosi chao kwa kufanya usajili wa wachezaji wenye uzoefu mkubwa ambao unalingana na wale wa Yanga lakini wanakuwa na wachezaji wenye uchungu na timu yao kama wakati wanacheza wao.

“Wakati wetu sisi tunacheza ilikuwa tunaweka pembeni mambo ya migogoro ya uongozi na kila mmoja alikuwa anapambana kwa ajili ya kuipigania timu yake kitu kama hicho kwa wachezaji wa sasa imekuwa nadra siyo ajabu ukasikia mchezaji wa Simba kabla ya mechi alikutwa na kiongozi wa Yanga,”anasema Mogella.

Ingawa Mogella aliwahi kuchezea Yanga miaka ya mwishoni kabla ya kuachana na mpira lakini anasema yeye ni shabiki mkubwa wa Simba lakini hafuraishwi na mwenendo wa timu hiyo katika siku za karibuni.