ALEXIS SANCHEZ: MSHIKA BUNDUKI ALIYE KILA KITU NDANI YA ARSENAL KATIKA EPL 2014/2015

Na Oswald Ngonyani.

Msimu wa Ligi Kuu ya England umefikia patamu kwa sasa, hapana shaka mashabiki wengi wa Ligi hiyo wamekaa mkao wa kula tayari kwa kushuhudia nyakati za mwisho za msimu huu, nyakati zitakazoweka bayana nafasi ya kila timu katika msimamo wa EPL 2014/2015.

Tumekwishajionea mengi lakini pia kusikia habari lukuki kuhusu mikakati ya kila timu shiriki katika Ligi ya msimu huu, huku Klabu ya Chelsea ikionekana kudhamiria vilivyo kuitwaa ndoo ya ‘EPL’ msimu huu kwa kuendelea kujikita kileleni kwa pointi 63 baada ya kucheza mechi 27.

Tazama, Mashetani wekundu baada ya kuboronga sana katika ligi iliyopita 2013/2014 chini ya David Moyes wameonekana kujidhatiti kwa hali na mali ili kuhakikisha kuwa wanairudisha heshima ya klabu yao iliyokuwa imeyeyuka ghafla, wapo chini ya Van Gaal kwa sasa na ama kwa hakika wanaonekana kudhamiria kufanya kitu fulani cha muhimu kwa mashabiki wao.

Wakati Mashetani hao wekundu wakionekana kujidhatiti kunako mbio za ubingwa wa EPL kwa msimu huu, Washika bunduki wa London wao wameonekana kufanya vema zaidi katika siku za usoni wakichagizwa na uwepo wa mchezaji tegemeo wa timu ya Taifa ya Chile Alexis Sanchez.

Nakumbuka usajili wa mchezaji huyu aliyekuwa akikipiga katika klabu ya Barcelona uliwafanya mashabiki wengi wa timu hiyo kuamini kuwa katika msimu huu wa sasa wa EPL timu yao hiyo huenda ikafanya makubwa zaidi pengine kuliko ilivyokuwa katika misimu iliyopita.

Ni wazi kuwa uwepo wa Sanchez umeifanya Arsenal iwe mahali ilipo sasa. Washika bunduki hawa wanashika nafasi ya tatu katika msimamo wa EPL nyuma ya vinara Chelsea na Man City, wakiwa na hazina ya pointi 58 baada ya kushuka dimbani mara 28.

Tayari mchezaji wao tegemeo, Alexis Sanchez amekwishafunga magoli 13 akishika nafasi ya tano katika orodha ya wafumania nyavu wa EPL msimu huu nyuma ya Sergio Aguero(Man City), Diego Costa (Chelsea),  Charlie Austin (QPR) na Harry Kane (Sunderland).

AKIWA NA BARCELONA ALIFANYA NINI?

Akiwa na Barcelona, alifanikiwa kucheza michezo 88 na hata kuitendea vema nafasi yake ya ushambuliaji kwa kuifungia timu hiyo magoli 39 katika mechi zake zote alizocheza. Mbali na Barcelona, Sanchez amewahi pia kuchezea vilabu vya Cobreloa (2005-2006), ambapo alifanikiwa kupangwa katika mechi 47 huku akifunga magoli 9.

Hakudumu sana katika klabu hiyo, badala yake alisajiliwa katika klabu ya Udinese ya nchini Hispania na kufanikiwa kuichezea katika misimu mitano yaani msimu wa  2006-2011 ambapo aliichezea klabu hiyo mechi 95 na kuifungia magoli 20.

 

MAISHA YAKE YAKE NDANI YA UDINESE YALIKUWAJE?

Akiwa ndani ya mkataba wa klabu  ya Udinese kwa nyakati tofauti aliwahi kutolewa kwa mkopo na kupelekwa katika vilabu vya  Colo- Colo (2006-2007) ambapo akiwa na timu hiyo alicheza michezo 32 na kufunga magoli 5.

Kama hiyo haitoshi, katika msimu wa 2007-2008 klabu hiyo ilimtoa kwa mkopo na kumpeleka katika timu ya River Plate ambapo kocha wa timu hiyo alimpanga Sanchez katika mechi 23 tofauti huku akifunga magoli 4 ambapo baadaye aliuzwa na kwenda kukipiga katika klabu ya Barcelona katika msimu wa 2011 alikokipiga mpaka anahamia Arsenal.

UHAMISHO WAKE KWENDA BARCELONA ULIKUWA NA THAMANI?

Alisajiliwa na Barcelona kwa mkataba wa dau la Euro 25 milioni, na kuwa mchezaji ghali zaidi katika historia ya wacheza kandanda wa nchini Chile kwani kabla yake hakuna mchezaji kutoka Chile aliyewahi kusajiliwa kwa kiasi hicho cha Pesa.

Jicho la kocha wa klabu ya Arsenal lilimuona, namzungumzia  mfaransa aliye muumini mkubwa wa Uchumi Profesa Arsene Wenger na hata kuamua kutenga kitita cha zaidi ya Euro 30 kwa ajili ya kuinasa saini yake.

JE WENGER ALIFANIKIWA?

Ndivyo ilivyokuwa kwani mpaka kufikia Mwezi  Julai mwaka jana 2014 dili hilo liliwekwa hadharani huku kila kitu kuhusu uhamisho wa mwanandinga huyo kikionekana kukamilika na hata kujikuta akiweka rekodi ya aina yake kwa Washika bunduki hao akiwa mchezaji wa pili kusajiliwa kwa dau nono zaidi klabuni hapo.

Sanchez ameweka rekodi ya kuwa nyuma ya Mjerumani  Mesut Özil, lakini pia ameendelea kuweka rekodi ya kuwa mchezaji kutoka nchini Chile aliyesajiliwa kwa kitita kikubwa zaidi katika mawanda ya soka ya nchini humo.

VIPI KUHUSU TIMU YAKE YA TAIFA?

Amekuwa mchezaji tegemezi wa timu ya Taifa ya Chile tangu mwaka 2006 akicheza nafasi ya kudumu ya ushambuliaji. Akiwa na kikosi hicho cha Taifa ameweza kupangwa katika michezo 70  lakini pia amefanikiwa kulichezea Taifa hilo katika fainali mbili za Kombe la dunia yaani mwaka 2010 na 2014. Kwa upande mwingine Sanchez amewahi kulitumikia Taifa hilo katika michuano ya Copa Amerika mwaka 2011.

Ana jina la utani analolitumia zaidi anapokuwa nchini kwao lakini pia alikuwa analitumia sana akiwa na Barcelona, ambapo wachezaji wengi walipenda kumuita Niño Maravilla. Ana urefu wa Sentimita 168 na uzito wa Kilo 69.  Mwaka 2007 alianza kukichezea kikosi cha timu ya Taifa ya Vijana cha Chile (U20) ambapo aliweza kukichezea kikosi hicho michezo 12 huku akifunga magoli mawili.

Baada ya hapo akaitwa katika kikosi cha timu ya wakubwa ambapo amedumu mpaka sasa akiwa amecheza michezo 71 na hata kufanikiwa kukifungia kikosi hicho magoli 24 (Takwimu hizi ni kabla ya Fainali za Kombe la dunia za mwaka jana 2014)

Ni wazi kuwa mashabiki wa Arsenal walikuwa na haki ya kuisubiri EPL 2014/2015 kwa shauku kubwa. Pengini tamati ya EPL kwa msimu huu 2014/2015 itatoa majibu stahiki ya kinachosubirishiwa.

NGOJA TUSUBIRI TUONE…….

(Maoni/Ushauri tuma kwenda 0767 57 32 87 au [email protected])