UKIMSIKIA MASAU BWIRE UNAWEZA KUPOTEZA NETWORK YA MECHI

Muziki wa Ruvu Shootings kumuulize Amissi Tambwe wa Yanga?

MAAFANDE wa Ruvu Shootings wametamba kuendeleza dozi katika mechi za ligi kuu Tanzania bara.

Tambo hizo zimekuja siku chache baada ya Maafande hao wa Mabatini Mlanndizi, Mkoani Pwani kuibuka na ushindi mara mbili uwanja wa nyumbani, mabao 2-1 dhidi ya Mtibwa Sugar na 2-1 dhidi ya Stand United

Afisa habari wa klabu hiyo, Masau Bwire amesema kwasasa wapo relini na hakuna wa kuwaondoa, hivyo maafande wa Tanzania Prisons wajiandae kunyolewa mwishoni wa wiki katika mechi ya ligi kuu itayopigwa uwanja wa Sokoine jijini Mbeya.

“Hali ya hewa ya Mbeya ni tofauti na Mlandizi, tunalazimika kuwaleta vijana mapema ili kuzoea hali ya baridi ya Mbeya. Tunataka wachezaji wasiwe na shida ya kutandaza soka, tunatarajia kuondoka wachezaji 21 na viongozi saba, tutaondoka alhamisi”. Amesema Masau.

“Kocha Mkenya, Tom Alex Olaba ana uhakika na kikosi chake, amebaini nini kifanyike na tunaamini tutachukua ushindi jumamosi dhidi ya Tanzania. Ametamba Bwire na kuongeza: “Treini ikiwa kwenye reli huwezi kuiondoa, tuko kwenye reli, hakuna anayeweza kutuondoa”.