SIMBA YAINGIA KAMBINI KUIWINDA PRISONS

WEKUNDU wa Msimbazi Simba wameanza mazoezi kujiwinda na mechi ya  ligi kuu soka Tanzania bara itayopigwa jumamosi uwanja wa Taifa, Dar es salaam dhidi ya Maafande wa Jeshi la Magereza, Tanzania Prisons.

Simba waliofungwa bao 1-0 na 'Chama la Wana', Stand United katika mechi ya ligi iliyopigwa uwanja wa CCM Kambarage mwishoni mwa wiki iliyopita wameanza mawindo hayo uwanja wa Jeshi wa JKT Mbweni, Dar es salaam.

Taarifa za uhakika kutoka ndani ya Simba zinaeleza kuwa kikosi hicho chini ya kocha mkuu, Goran Kopunovic kitaingia kambini kesho katika Hoteli ya Ndege Beach.

Mechi ya jumamosi inatarajiwa kuwa na upinzani mkubwa kutokana na matokeo ya timu zote mbili.

Prisons walitoka suluhu (0-0) dhidi ya Azam fc juzi usiku uwanja wa Azam Complex na kabla ya mechi hiyo walifungwa mabao 3-0 dhidi ya Yanga, Uwanja wa Sokoine.

Wajelajela wanaburuza mkia katika msimamo wa ligi kuu wakijikusanyia pointi 12, wakati Simba wapo nafasi ya nne wakiwa na pointi nne nyuma ya Kagera Sugar wenye pointi 24.

Katika mechi dhidi ya Azam, Prisons walicheza kwa nidhamu ya hali ya juu na kama wataendeleza moto ule, basi Simba lazima wajipange.