RONALDINHO GAUCHO: DUNIA HAITAMSAHAU KWA UFUNDI WAKE WA KUUCHEZEA MPIRA UWANJANI

Na Oswald Ngonyani

Pengine siwezi kuongopa kama nitaeleza kuhusu maisha ya Ronaldinho katika enzi zile akiwa na ubora wa hali ya juu na kuzikonga nyoyo za wapenda soka wengi duniani kote, ni kama kusema kilikuwa kipindi cha Ufalme wake, naam! Kipindi cha Mfalme Ronaldinho.

Uwezo wake wa kuufanyia chochote mpira uliwakuna wengi na hata kuzidi kukumbukwa mpaka leo hii katika nyakati za akina Lionel Messi na Cristiano Ronaldo, ama kwa hakika miaka ile ya 2000 na ushee ilipendezeshwa sana na umaridadi wa Mbrazili huyu.

Ronaldinho ni nani?

Ni nyota wa nchini Brazili ambaye amekuwa akicheza soka kama kiungo mshambuliaji na ni mtundu sana wa kuuchezea mpira  akiwakuna wengi awapo ndani ya dimba hasa kutokana na madoido anuai ayafanyayo awapo dimbani.

Jina lake halisi ni Ronaldo de Assis Moreira, alipewa jina la Ronaldinho kwa kufuata matamshi ya lugha ya Kireno lakini pia kujitofautisha na akina Ronaldo wengine ambao ni wengi sana huko Brazil, kama walivyo akina Mapunda, Tembo, Komba, Ngonyani  huko Songea ama akina Mwandosya, Mwambulukutu, Mwakasege, Mwakasoke jijini Mbeya.

Gaucho ni jina lake la kimichezo ambalo linamtofautisha zaidi na wanasoka wengineo kama akina Rivaldo, Ronaldo,  na wengineo wengi. Ni miongoni mwa wanasoka wachache waliowahi kuiteka dunia nyakati hizo ambao wanaendelea kuhusudiwa mpaka sasa.

Aliwahi kutwaa tuzo ya Mchezaji Bora wa Dunia mara mbili mfululizo katika miaka ya 2004 na 2005. Alipata mafanikio makubwa zaidi katika uchezaji soka alipokuwa katika timu ya FC Barcelona ya Uhispania lakini hata baada ya kuhamia katika kikosi cha AC Milan cha nchini Italia.

Aliwahi kuvichezea vilabu gani?

Achana na klabu ya Flamengo ya nchini kwao, Ronaldinho amewahi kuvichezea pia vilabu vya FC Barcelona lakini pia AC Milan na kuweza kuvifanyia mambo makubwa timu hizo.

Lakini katika miaka ya hivi karibuni, hakuna atakayenipinga kama nitatamka wazi kuwa mtalamu huyu wa chenga amepungua kiwango, pengine hali hii imesababishwa na kuongezeka uzito, lakini pia kutokana na starehe nyingi anazozifanya baada ya kuwa na fedha za kutosha.

Je, ni kweli ana fedha za kutosha?

Ronaldinho ni mmoja kati ya wanasoka matajiri duniani ambaye amepata utajiri huo kupitia uwezo wake wa usakataji wa kandanda kwenye klabu kubwa duniani na hata kuingia katika mikataba minono na makampuni makubwa yaliyokuwa yakimlipa kwa matangazo, miongoni mwa makampuni hayo ni pamoja na Nike na Pepsi. Utajiri wake unakadiriwa kufikia zaidi ya dola Milioni 90.

Amekuwa akipata kiasi cha dola milioni 24 kwa mwaka. Tazama, alikuwa akipata kiasi cha Euro milioni 25 kwa mkataba wake wa miaka mitatu katika timu ya AC Milan ya Italia. Lakini pia inasemekana kuwa alikuwa akilipwa kiasi cha dola milioni 10 kwa mwaka kutokana na mshahara wake wakati akiwa pale Nou Camp.

Vipi kuhusu mipangilio yake ya kifedha?

Kama walivyo watu wengine wengi walio na fedha, Ronaldinho naye hayupo nyuma katika hili, ni mahiri katika matumizi ya pesa hususan katika kuishi maisha ya kifahari kutokana na faida aliyoipata baada ya kukitendea haki  kipaji chake dimbani.

Anamiliki nyumba kadhaa nchini kwao Brazil lakini pia barani Ulaya katika nchi ya Hispania. Anamiliki na kuendesha magari ya bei mbaya na ya kifahari sana kama Mercedes-Benz Eclass na Mercedes-Benz  CLS.

Ana gari lenye gharama ya juu zaidi aina ya Bugatti Veyron ambalo linasifika kwa kuwa na kasi ya ajabu. Gari hilo la mashindano limekuwa likiteka nyoyo za watu wengi akiwemo Ronaldinho mwenyewe.

Limekuwa na mvumo kama wa nyuki likiwa na uwezo wa kusafiri kwa kasi ya kilometa 253 kwa saa.  Alilinunua gari hilo kwa dola milioni 1.8. Mara kwa mara aendapo mazoezini hupendelea sana kulitumia.

Ana Hummer H2, ambayo ni imara  na yenye nguvu. Ni gari ya ajabu wakati inapoendeshwa ambayo humvutia kila mtu. Ni moja kati ya magari yanayopendwa na mastaa wengi wa majuu mmoja wapo akiwa ni mcheza sinema za kibabe Arnold Alois Schwarzenegger.

Si mtu anayependa kujinyima, amekuwa mfuasi mzuri wa anasa kama walivyo akina Ronaldo wa Brazili lakini pia akina Ronaldo wa Ureno. Mara zote anaposafiri safari ya mbali lakini pia hata safari ya karibu amekuwa akisafiri kwa kutumia ndege ya kukodi na hata kulipa kiasi kikubwa cha pesa.

Ameifanyia nini Jamii?

Achana na habari za Desemba 8 mwaka juzi (2013) zilizowahi kutikisa anga la Tanzania kuhusu mwanasoka huyu kutaka kutoa msaada  wa  fedha  zitakazo  tumika  kwa  ajili  ya  ujenzi  wa  hospitali  katika  mkoa  wa  Singida.

Kutokana na kufahamika zaidi kwa watu wengi na hata kulifanya jina lake kuwa kubwa, Ronaldinho amekuwa mwenye ushawishi mkubwa katika jamii na hata kuweza kumiliki mfuko wa hisani kwa ajili ya kusaidia watu wengine. Wakati fulani aliwahi kugombana na kaka yake kwa matumizi mabaya ya fedha.

Ametokea katika familia ya namna gani?

Alizaliwa katika familia ya tabaka la kati nchini Brazil. Baba yake alikuwa akifanya kazi getini na alipatwa na mkosi wa kufiwa na baba yake wakati akiwa na umri wa miaka nane tu.

Katika familia yao amezaliwa pamoja na kaka yake na dada yake.Amekuwa na mahusiano na wanawake wengi wa kariba tofauti na anajulikana zaidi kwa kuwa na mahusiano na mwanamke wa Kifaransa wakati alipokuwa Barcelona.

Ana mtoto wa kiume aliyepata kutokana na kuwa na mahusiano ya kimapenzi na dansa wa Kibrazil, Janaina Mendes. Ili kujenga kumbukumbu isiyofutika, aliamua kumpatia mwanaye jina la marehemu baba yake.  Kwa sasa anadaiwa kuoa, awali aliwahi kuoana na Milene Domingues lakini baada ya muda mfupi walipeana talaka.

Hakika RONALDINHO GAUCHO: DUNIA HAITAMSAHAU KWA UFUNDI WAKE WA KUUCHEZEA MPIRA UWANJANI.

Wakatabahu wakaa.

(0767 57 32 87)