PUMZIKA KWA AMANI CHRISTOPHER ALEX MASSAWE: “MPAMBANAJI MAHIRI DIMBANI, ULIYELALA USINGIZI WA FOFOFO”

Alex enzi za uhai wake

Na Oswald Ngonyani

Nyakati na enzi zingali zikitiririka huku maisha yakizidi kusonga mbele na historia ikizidi kuwekwa kila jua linapochomoza. Siku zote kila tunapoianza siku mpya, jana huonekana kuwa na afadhali zaidi kuliko leo.

Hivi ndivyo maisha ya binadamu yalivyo, yanatofautiana siku hadi siku na mara nyingi siku iliyopita huonekana kuwa na unafuu zaidi kuliko siku mpya, ni hali ambayo ipo tu wala hauwezi kuikwepa.

Majonzi na masononeko ameumbiwa binadamu. Pengine hata wanyama wana hulka hiyo lakini kwa sababu hawana utashi inakuwa ni ngumu kwao kuwalinganisha na binadamu.

“Pumzika kwa amani Christopher Alex Massawe,mpambanaji mahiri dimbani uliyelala usingizi wa fofofo” nakumbuka sana mchango wako katika ushindi wa ugenini dhidi ya ZAMALEK ya Misri,  Kocha wa enzi hizo JAMES AGGREY SIANG'A alikuwa anakukubali kuliko kawaida naamini taarifa hizi atazipokea kwa masikitiko makubwa huko aliko.

Unakikumbuka kikosi cha Simba cha mwaka 2003? Kile kikosi ambacho kiliwatoa jasho waliokuwa mabingwa watetezi wa michuano ya klabu bingwa barani Afrika nyumbani kwao katika dimba la Stade International du Caire?

Naizungumzia klabu ya Zamaleki FC ya nchini Misri ambapo ubingwa wao ulivuliwa na Jeshi la Msimbazi kutoka Tanzania, timu ya Simba.

Nyuma ya mafanikio hayo makubwa ambayo Simba iliyapata kulikuwa na mtu mmoja aliyekuwa ameweka historia kubwa sana katika soka la bongo na Afrika kwa ujumla, Christopher Alex Massawe.

Mpambanaji huyu alifunga penalti ya ufundi na ya ushindi iliyowapeleka Simba mpaka katika hatua ya robo fainali ya michuano hiyo mikubwa kwa ngazi ya Vilabu.

Waarabu wengi wala hawakuamini, walibaki na fadhaiko mioyoni mwao. Christopher Alex alikuwa ameyeyusha ndoto zao za kuutetea ubingwa wao waliokuwa wameutwaa katika msimu uliotangulia.

Ilikuwa ni mechi ya marudiano baada ya ile ya awali kuisha kwa Simba kuibuka na ushindi wa goli 1-0 jijini Dar es Salaam kabla ya kufungwa 1-0 nchini Misri na baadaye changamoto ya mikwaju ya penalti kuchukua nafasi yake.

Lilikuwa ni jeshi lililokuwa na mafundi wengi kama akina Juma kaseja, Said Swedi Ramadhan Waso Ramadhan, Victor Costa, Boniface Pawasa, 6.Christopher Alex (+), Athuman Machupa, Suleiman Matola, Emanuel Gabriel, Yusuph Macho Ulimboka mwakingwe na wengine wengi.

Katika Jeshi hilo kuna askari mmoja ambaye kwa bahati mbaya sana hatunaye duniani kwa sasa, Christopher Alex Massawe kama nilivyokwishamwelezea katika aya za awali, ameianza safari ambayo kila aendaye huwa harudi.

Amefariki dunia baada ya kulala kitandani kwa muda mrefu pasipo kupata nafuu. Mwisho wa siku Mwenyezi Mungu ameamua kumchukua, naam amelala usingizi wa moja kwa moja, usingizi wa fofofo.

Ni kama kusema Tanzania imempoteza mmoja kati ya viungo bora kabisa waliowahi kutamba katika soka la bongo. Umaridadi wake wa kuichezesha timu lakini pia kufanya maamuzi ya ushindi kwa timu yake ni vitu ambavyo havitakuja kusahaulika  katika vichwa vya wapenda soka wengi nchini Tanzania.

Ni pigo kwa timu ya soka ya Simba SC kwa sababu aliifanyia mambo makubwa mno na hata kuchagiza ukulu wake katika kuuchezea mpira, ni pigo kwa vilabu vya CDA ya Dodoma na reli ya Morogoro kwa sababu aliwahi kuwa sehemu ya mafanikio yenye tija kwa vilabu hivyo.

Jumapili iliyopita (22/02/2015) saa tatu za asubuhi ‘askari’ huyu aliianza safari ambayo kila mwanadamu ataipitia, ni kama kusema ametangulia na sisi tutamfuata.

Amefariki dunia katika hospitali ya Milembe mkoani Dodoma alikokuwa akitibiwa baada ya kuugua kwa muda mrefu ugonjwa wa Kifua Kikuu.

Taarifa sahihi kutoka kwa Mama yake mzazi Bi Martha Matonya aliyekuwa akimuuguza amesema walimfikisha hospitalini hapo Ijumaa ya wiki iliyopita baada ya kuona hali yake inazidi kuteteleka.

Alisema ilipofika Jumamosi hali yake ilibadilika, akashindwa kuongea hadi alipofariki siku iliyofuata.

Kwa simanzi na uchungu mkubwa Mwanamama huyu aliweka bayana mateso aliyokuwa ameyapata mtoto wake kabla ya kufikwa na umauti;

“Mwanangu hali yake ilibadilika akawa hana uwezo hata wa kuongea ila ameteseka sana afadhali akapumzike’’Ndivyo alivyonukuliwa akisema Bi Matonya baada ya kumuuguza mtoto wake mpendwa kwa muda mrefu pasi mafanikio.

Marehemu Christopher Alex, alizaliwa Septemba 12 mwaka 1975,na kupata elimu yake ya msingi katika shule ya msingi Uhuru na kumaliza katika shule ya Chamwino huko Dodoma mwaka 1993,na alianza kucheza mpira kwenye timu ya Daraja la nne Chamwino UTD na baadaye daraja la tatu akiwa na kikosi cha Aston Villa nayo ya Dodoma.

Mwaka 1999-2001 aliitumikia klabu ya CDA ya Dodoma,kabla ya kutimkia klabu ya Reli mwaka 2002 na baadaye kujiunga na wekundu wa msimbazi Simba,Marehemu ameacha mtoto mmoja aitwaye Alex.

“A Lion Never Die, He Just Lays There Sleeping” Kwa maana Simba huwa hafi, analala tu chini kupumzika. Mungu aiweke Roho ya marehemu Christopher Alex mahala panapo Stahili, Ameen.

‘Kwa maana huyu alionekana anampendeza Mungu, akachukuliwa’ Yeyey mbele yetu, sisi nyuma yake.

(0767 57 32 87) au [email protected]