NYAKATI TAMU NA CHUNGU ZA ARSENE WENGER MBELE YA MABOSI WANAOMHUSUDU NA MASHABIKI WANAOMPINGA

Na Oswald Ngonyani

Jina lake linaonekana kuzungumzwa tena na tena kwa sasa, hii inatokana na mwenendo usiotia matumaini kwa kikosi anachokinoa, mwenendo ambao tayari umekwisha wagawa mashabiki wengi wa ‘The Gunners’.

Kitendo cha kuendelea kuwa mdebwedo kwa Man United ni miongoni mwa sababu ambazo zimewafanya mashabiki wengi wa Arsenal kumuona Arsene Wenger kama sababu ya timu yao kuasua sua.

Wengi wanaamini kuwa Wenger ana kikosi kizuri, tena kizuri sana tatizo linakuja katika namna ya kuwatumia wachezaji aliokuwa nao yaani mfumo wa kiuchezeshwaji ndani ya dimba lakini pia uteuzi anaoufanya kwa kikosi chake cha kwanza, wengi huamini kuwa anakosea.

Tangu ajiunge na Arsenal, Wenger amepitia katika nyakati tofauti tofauti, nyakati ambazo kwa kiasi fulani zimempa heshima kubwa sana lakini pia kwa upande mwingine zimemweka katika masononeko makubwa baada ya kukinzana na matakwa ya mashabiki wa timu husika.

NYAKATI TAMU ZA WENGER KWA ARSENAL

Nakumbuka  Msimu kamili wa kwanza wa Arsene Wenger 1997/98 katika uwanja wa Highbury, ulishuhudia Arsenal kwa mara ya pili katika historia yake ikifanikiwa kunyakua vikombe vyote viwili; cha Ligi Kuu na FA na kumwezesha mfaransa huyo kuchukua tuzo ya Carling ya meneja bora wa mwaka, ni nyakati ambazo alionekana kuwa tumaini jipya na jema kwa wakereketwa wengi wa ‘The Gunners’.

Ni katika nyakati hizo Dennis Bergkamp akawa mwanasoka bora wa mwaka wa Chama cha Waandishi wa Habari za Soka (FWA) na mwanasoka bora wa mwaka wa Chama Cha Wanasoka wa Kulipwa (PFA).

Msimu huo huo uling’ara zaidi kwa wanasoka wa Arsenal kutoka nchini Ufaransa Emmanuel Petit na Patrick Vieira baada ya kutoka kutoa mchango wao mkubwa katika ushindi wa timu yao ya taifa katika fainali za kombe la Dunia 1998.

Arsenal kwa miaka mitatu mfululizo ikakamata nafasi ya pili na mwaka 2001, Arsenal ikafika kunako robo fainali ya Kombe la Mabingwa wa Ulaya kabla ya kutolewa na Valencia ya nchini Hipania.

NYAKATI TAMU ZAIDI ZA WENGER PALE HIGHBURY

Kipindi cha 2001/02 mambo yakawa mazuri zaidi kwa Wenger na Arsenal yake pale walipoweza tena kuchukua vikombe vyote viwili kwa kuichapa Chelsea katika fainali ya FA na kubeba kombe la ligi kwa kuilaza Manchester 1-0 katika mechi kali ya kukumbukwa katika uwanja wa Old Trafford na kufikisha rekodi ya michezo 13 bila ya kufungwa.

Nakumbuka katika msimu huo mzima  hawakuwahi kufungwa nyumbani. Hivyo Arsene  Wenger akatajwa kuwa meneja bora wa mwaka wa Barclays huku Robert Pires akitajwa kuwa mwanasoka bora wa Chama cha Waandishi wa habari za michezo (FWA).

Msimu uliofuata Arsenal wakashindwa kwa ufinyu kubakisha kombe lakini wakaweza kuwa klabu ya kwanza kwa zaidi ya miaka 20 kuweza kubakisha kombe la FA baada ya kuilaza Southampton 1-0.

Ni katika kipindi hicho mchezaji wa Kihistoria wa timu hiyo, Thierry Henry akachaguliwa na PFA na FWA kuwa mchezaji bora wa mwaka. Henry akawa ameweza kujiunga na Bergkamp katika orodha ya wachezaji walioweza kuifungia Arsenal magoli 100.

WENGER NA REKODI YA KUTOPOTEZA MCHEZO HATA MMOJA KATIKA EPL

Msimu wa 2003/04 Arsenal ya Wenger ikamaliza michezo yote bila ya kufungwa na kuchukua taji la ubingwa wa ligi (EPL). Pia walimaliza michezo yote wakiwa pointi 11 mbele ya mshindi wa pili Chelsea na kubeba taji kwa mara ya 13.

Wakati huo huo Cesc Fabregas ambaye aliwasili Arsenal mwezi wa kwanza, akaweza kuweka rekodi ya aina yake ya kuwa mchezaji mdogo kabisa kuchezea Arsenal akiwa na umri wa miaka 16 na siku 177 wakati msimu unamalizika.

Vipigo vya nusu fainali ya FA walivyovipata kutoka kwa Manchester United na robo fainali ya ligi ya mabingwa Ulaya toka kwa Chelsea vikaondoa matumaini yote ya kunyakua vikombe vitatu. Rekodi ya kutofungwa ikaendelea msimu uliofuata na mwezi wa nane Arsenal ikaipiku rekodi ya Nottingham Forest ya kucheza muda mrefu bila ya kufungwa katika EPL.

KUTOKA HIGHBURY MPAKA EMIRATES

Kampeni ya 2005/06 ilikuwa ya mwisho katika uwanja wa Highbury ambao ulikuwa ni makazi ya Arsenal kwa miaka 93. Timu ikaweza kukamata nafasi ya nne mwisho wa msimu na kuweza kupata nafasi ya kushiriki Ligi ya Mabingwa Ulaya.

Kwa wakati wote ilipokuwa Highbury, rekodi ya Arsenal ni kama ifuatavyo: Michezo 2,010; kushinda 1,196; sare 475; kufungwa 339; magoli 4, 038; magoli ya kufungwa 1,955.

REKODI TAMU ZAIDI YA KUCHEZA FAINALI YA UEFA

Msimu wa 2005/06 Arsenal iliweza kufanya kazi kubwa na nzuri iliyoonekana kuwapendeza wanazi wengi wa klabu hiyo. Washika bunduki hao waliweza kufika fainali ya Kombe la Mabingwa Ulaya maarufu kama UEFA.

Mbali na kufika fainali ya UEFA, pia waliweka rekodi ya kucheza Michezo 12 bila ya kufungwa ikijumuisha rekodi mpya ya mashindano, kutofungwa katika mechi 10 mfululizo. Mwenendo huo wa aina yake ukawawezesha Washika bunduki hao kumenyana na Barcelona katika fainali ya Kombe la Mabingwa Ulaya tarehe 17 mwezi Mei katika dimba la Stade de France.

Licha ya Jens Lehman kupewa kadi nyekundu baada tu ya dakika 18 za mchezo, washika bunduki walikuwa wa kwanza kufunga bao kupitia kwa mlinzi Sol Campbell. Hata hivyo mwishoni mwa kipindi cha pili, Barcelona wakapachika mabao mawili na kuumiza mioyo ya mashabiki wa Arsenal waliofunga safari kuishangilia timu yao huku wakiamini kuwa wangeutwaa ubingwa huo kwa mara ya kwanza ndoto ambayo iliyeyushwa na akina Samuel Etoo pale Stade de France.

MAISHA NDANI YA UWANJA MPYA WA EMIRATES

Wakati klabu ikijiandaa kuhamia Emirates, nahodha wao na mfungaji bora kabisa katika historia ya klabu, Thierry Henry akaweka dhamira ya kubaki Arsenal kwa siku zijazo. Baadaye akiwa Ujerumani katika kombe la Dunia akaweza kuisaidia nchi yake kufika fainali. Mwezi wa saba 2006 klabu ikahama rasmi Highbury ambako ilidumu kwa miaka 93.

Dennis Bergkamp akacheza mechi yake ya mwisho kwa Arsenal na ya kwanza kabisa ndani ya uwanja mpya wa Emirates wakati Ajax Amsterdam inapambana na Arsenal katika mechi maalumu ya kumuaga mwanasoka huyo nguli.

UHAMISHO WA THIERY HENRY NA KUSTAAFU KWA MKONGWE BERGKAMP

Baadaye tangu kustaafu kwa Dennis Bergkamp lakini pia tangu kuondoka kwa akina Thiery Henry na Patrick Viera kwa kiasi kikubwa klabu ya Arsenal ikaanza kupoteza umaarufu wake wa kuwa klabu tishio nchini England.

Pamoja na kudumu na Wenger kwa kipindi chote hiki bado mashabiki wake hawataki kuridhika na mwenendo wa kikosi hicho kwa siku za karibuni huku wengi wakionekana kushinikiza Arsene Wenger kuondoka Emirates kwa lengo la kuirudisha hadhi ya timu yao.

Mara kwa mara mashabiki wamekuwa wakionekana kulalamika sana lakini tofauti na mategemeo ya wengi, mabosi wa The Gunners wanaonekana kumkumbatia sana Wenger, nadhani kuna tija wanayoipata kutoka kwa Mfaransa huyu, tija ambayo haipo wazi kwa mashabiki.

Rekodi yake kwa kiasi kikubwa inaonekana kuvutia sana, hapana shaka mashabiki wanataka ayafanye mambo aliyokwishawahi kuyafanya siku za nyuma hususan katika msimu wa 2003/2004 ili kuiweka Arsenal katika ubora wake, tofauti na ilivyo sasa.

Kabla yake, klabu ya Arsenal wala haikuwa na uteja wa kudumu kwa vilabu vya Man U na Chelsea. Lakini kwa siku za karibuni washika bunduki hao wameonekana kuwa mteremko sana kwa vilabu hivyo na hata kuwafanya mashabiki wake wakose amani mioyoni mwao.

Wanaitaka Arsenal yao, Arsenal ile iliyowahi kumaliza Ligi pasipo kupoteza mchezo, Arsenal ile iliyowahi kucheza fainali ya UEFA, Arsenal ya ukweli iliyowafanya mashabiki wake watembee kifua wazi huku wakijidai.

(0767 57 32 87)