MASHABIKI WA ARSENAL ‘WALIVYOUMISI’ MSIMU WA 2003/2004

Na Oswald Ngonyani

Hapana shaka Msimu wa  2003-2004 utaendelea kukumbukwa na mashabiki wengi wa Arsenal duniani kote kutokana na mambo makubwa yaliyokuwa yamefanywa na wapiganaji wa kikosi hicho, wapiganaji ambao waliongozwa na Thiery Henry na Patrick Vierra.

Kumbukumbu zinaeleza kuwa ulikuwa ni msimu wa 12 wa Arsenal katika Ligi Kuu nchini England (EPL) lakini pia msimu wa 74 mfululizo katika ligi ngazi ya juu katika soka la England. 

Binafsi nitauadadavua  Msimu huu kwa mapana yake ili kuweza kuuelezea upekee wa Washika bunduki hawa nyakati hizo, enzi ambazo kila mchezaji alionekana kuwa na mchango mkubwa ndani ya dimba tofauti na ilivyo sasa.

Ni kweli, Msimu wa 2003/2004 unabaki kuwa wa historia katika katika klabu ya Arsenal lakini pia kwa upande fulani katika historia ya mchezo wa soka nchini England. Arsenal ilifanya kitu fulani ambacho kimeifanya iheshimike mpaka sasa.

Timu hii kutoka London ya Kaskazini iliweza kumaliza msimu mzima wa ligi pasipo kupoteza mchezo wowote na kuifanya kuwa timu ya pili kuingia katika historia ya soka kwa kumaliza msimu mzima bila kufungwa. Timu ya kwanza ikiwa ni Preston North End mwaka 1889, timu zote hizo zimepewa majina ya utani "The Invincible" (Yaani timu zisizofungika)

Wakati fulani, Meneja wa Arsenal Mfaransa aliye muumini mkubwa wa uchumi, Arsene Wenger alitabiri mwaka 2002 kwamba ana kikosi bora kinachoweza kumaliza msimu mzima bila kufungwa.

 

Alikuwa hatanii, Ni kweli mafanikio hayo yalifikiwa japokuwa hali haikua hivyo katika michuano mingine ambayo kikosi hicho kilishiriki mwaka huo kwani waliweza kutolewa na Chelsea katika hatua ya Robo fainali ya Ligi ya mabingwa ulaya (UEFA)  na kufika hatua ya nusu fainali katika Kombe la FA na lile kombe la Ligi ( Carling Cup zamani hivi sasa ni Capital one)

              AKINA NANI WALIMPA KIBURI WENGER?

Nakumbuka baada ya kikosi cha Wenger kukubali kufungwa 2-1 na Liverpool msimu uliotangulia katika fainali ya kombe la FA wakati wakitangulia kwa goli 1-0. 

Msimu mpya ulipoanza Wenger alimsajili mlinda mlango Jens Lehmann kutoka Borussia Dortmund ya Ujerumani kwa paundi milioni 1.5 huku akiwapa mikataba mipya wachezaji wake nahodha Patrick Viera na winga Robert Pires.

Giovanni van Bronckhorst alisajiliwa kutoka Rangers kwa paundi milion 8.5 wakati Sol Campbell alijiunga na Arsenal akitokea kwa wapinzani wa jadi Spurs.

Kinda Francis Jeffers alijiunga akitokea Everton kwa ada ya uhamisho paundi milion 8. Janichi Inamoto  na Richard Wright, Johan Djourou, Gael Clichy,Cesc Fabrigas pia waliongezwa kikosini wakati msimu mpya ulipokaribia.

Wapambanaji hawa waliungana na wachezaji wengine waliokuwepo kikosini katika kuweka historia. Hapa alikuwepo Mfungaji bora wa msimu huo Thiery Henry aliyekuwa amefunga magoli 30 katika ligi na magoli 39 katika michuano yote.

Walikuwemo pia akina Ashley Cole,Patrick Viera,Martin Keown,Fredrick Ljungberg, Dennis Bergkamp,Sylvain Wiltord, Lauren, Edu,Gilberto Silva,Reyes, Nwankwo Kanu, Kolo Toure na wengineo.

       UKWELI KUHUSU MATOKEO YA THE GUNNERS KWA MSIMU MZIMA WA LIGI

Ni kweli umaridadi wa kikosi cha Wenger katika msimu wa 2003/2004 ulikifanya kikosi hicho kiwe gumzo katika mawanda ya soka la ndani na nje ya England. Siyo Ulaya tu hata nje ya bara hilo bado ukulu wa Arsenal ulizidi kuzungumzwa.

Arsenal ya wakati huo ilifanikiwa kuzifunga timu zote zilizokuwa zinashiriki EPL katika msimu huo isipokuwa vilabu viwili pekee Man United na Portsmouth, vilabu ambavyo viliambulia sare katika mechi  zote mbili dhidi ya Arsenal.

Msimu ulimalizika na Arsenal kuweka historia mpya katika Ligi kuu England kwa kushika nafasi ya kwanza ikitawazwa mabingwa wapya wa England.

Wanaume hawa walicheza jumla ya mechi 38, na kushinda mechi 26, sare 12 pasipo kupoteza mchezo wowote.

Walifunga magoli 73 na kufungwa magoli 26 na kupata jumla ya pointi 90 kati ya magoli hayo, 30 yalifungwa na Thierry Henry ambaye aliibuka kinara wa kufumania nyavu katika EPL msimu huo.

WAPAMBANAJI HAWA WAPO WAPI KWA SASA?

Wengi wao wamestaafu soka kwa sasa huku mfungaji wao kwa miaka yote tangu kuanzishwa kwa klabu hiyo, Thiery Heinry akiwa amestaafu soka na kujikita katika mawanda ya uchambuzi wa kandanda katika kituo maarufu cha televisheni cha Sky sport.

Akina Jens Lehmann, Lauren, na Sol Campbell, wote hawa wamekwishastaafu soka kwa sasa na kufanya mambo mengine lakini akina Kolo Toure na Gilberto Silva wangali wakisakata ‘Gozi la ng’ombe’

Patrick Viera aliajiriwa na mabosi wa timu hiyo kama Afisa wa Maendeleo ya Soka wa klabu ya Manchester City huku Dennis Bergkamp akihudumu katika klabu ya Ajax akama kocha msaidizi.

Ama kwa hakika kilikuwa ni kipindi ambacho Mashabiki wengi wa Arsenal wangependa sana kijirudie, lakini  mambo yameendelea kwenda ndivyo sivyo kwa Washika bunduki hao na hata kujikuta wakiwa wasindikizaji wa kila mwaka katika mbio za ubingwa katika EPL.

Hapana shaka Profesa Wenger ana kazi ya ziada, kazi ya kuirudisha Arsenal ile iliyokuwa imemaliza Ligi pasipo kupoteza mchezo na hata kutwaa ubingwa wa EPL mapema. Si kazi rahisi, akili ya ziada inatakiwa kutumika zaidi vinginevyo mambo yataendelea kuwa yale yale.

Nawasilisha hoja………. 

(0767 57 32 87)