LOGA AANZA KWA SARE KENYA

Na Bertha Lumala, Dar es Salaam

Kocha mkuu wa AFC Leopards, Zdravko Logarusic amewaomba mashabiki wa timu hiyo kuendelea kuisapoti timu licha ya kuanza msimu huu wa Ligi Kuu ya Kenya (KPL) kwa suluhu dhidi ya Chemelil Sugar.

Licha ya kutengeneza nafasi nyingi za mabao, Ingwe haikufanikiwa kuipita ngome ya Chemelil na baada ya mechi hiyo juzi, Loga ambaye alitua Kenya wiki iliyopita, aliwaomba mashabiki kuwa na uvumilivu kwa sababu bado anasuka timu.

KUWENI WAVUMILIVU

"Mashabiki wanapaswa kutokata tamaa kwa sababu ya sare, wanapaswa kuendelea kuiunga mkono timu. Mimi bado mpya hapa, ninawasoma wachezaji na nimewasoma kweli kweli. Baada ya muda mfupi tutakuwa salama.

Kama mlivyoona leo, nimefanya mabadiliko ya mapema (kumtoa Musa Mudde na kumuingiza Joseph Wanyonyi) kulikuwa na faida kubwa maana tulirudi mchezoni.

'Tulikuwa na uwezo wa kushinda mechi hii, lakini tumepoteza nafasi nyingi tulizotengeneza, tutalifanyia kazi suala hilo," aamesema Loga.

Sare hiyo imeiacha Ingwe katika nafasi ya nane ya msimamo wa KPL ikiwa na pointi moja.