KUTANA NA WANANDINGA 10 BORA WALIOTIKISA KATIKA USAJILI WA MSIMU MPYA WA EPL 2014/2015

Na Oswald Ngonyani

Wakati Ligi Kuu ya England (EPL) ikiwa inazidi kushika kasi, hapana shaka nitakuwa sijakosea iwapo nitawazungumzia wachezaji wachache katika Ligi hiyo ambao kwa kiasi kikubwa usajili wao ulionekana kutia fora zaidi kabla ya kuanza kwa msimu mpya wa Ligi 2014/2015.

1.      Angel Di Maria

Mwanandinga huyu raia wa Argentina ni kama ‘Lulu’ kwa sasa katika kikosi cha Mholanzi Louis Van Gaal ambapo mashabiki wengi wa Man U wanaamini kuwa uwepo wake utachagiza ari ya ushindi katika kikosi chao hicho ambacho msimu uliopita hakikuwa na jipya.

Mabosi wa ‘Man U’ wala hawakuwa na hiyana, walijikuta wakiweka mezani mzigo wa pauni Milioni 59.7 kumng’oa katika klabu yake ya Real Madrid na hata kuanza maisha mapya pale Old Trafford. Usajili wake umeonekana kutia fora zaidi.

2.      Alexis Sanchez

Siku zote imezoeleka kuona klabu ya Barcelona ikiinyima raha klabu ya Arsenal kwa kuwapoka wachezaji wake tegemezi, safari hii mambo yameonekana kwenda kinyume kwani Alexis Sanchez alijikuta akiihama klabu yake ya Barcelona na hata kutua kunako mitaa ya Fly Emirates.

Pengine uwepo wa mafundi wengi pale Nou Camp ulimfanya nyota huyu kutoka Chile kuridhia kuihama klabu hiyo lakini pia mabosi wake kutokuwa na kinyongo katika hilo.

Ni kama kusema amekwenda kuongeza nguvu zaidi katika kikosi cha Profesa Wenger huku mashabiki wengi wa ‘Washika bunduki’ hao wakionekana kusubirishia makubwa.  Amesajiliwa kwa Pauni Milioni 35.

 

3.      Diego Costa

Mashine ya Chelsea inayoonekana kuwa mhimili katika kikosi cha Jose Mourinho. Umakini wake katika kucheka na nyavu umemfanya awe na jina kubwa na hata kuzidi kuwanyima raha wapinzani katika EPL.

Mabosi wa Cheslea hawakuwa na hiyana, walimsajili kutoka katika klabu ya Atletico Madrid kwa dau nono la Pauni Milioni 32. Tangu ajiunge na Chelsea tayari amekwisha ifanyia makubwa timu hiyo katika EPL na hata kuiweka timu hiyo katika Uongozi wa Ligi kwa sasa.

4.      Eliaquim Mangala

Pamoja na kuwa na shehena la wachezaji wenye vipaji, Matajiri hawa wa England (Man City) wala hawakubweteka kufanya usajili.

Mazungumzo yao dhidi ya klabu ya FC Porto ya nchini Ureno yalikuwa na tija kubwa na hata kufanikisha kuinasa saini ya mwanasoka huyu aliyetua Etihad kwa ada ya Pauni Milioni 32.

5.      Cesc Fabregas

Klabu ya Barcelona bado imeonekana kuwashangaza wengi msimu huu hasa kwa kujikuta ikiwatoa kirahisi sana wachezaji wake tofauti na misimu iliyopita.

Kitendo cha kuondoka kwa wachezaji Alexis Sanchez kwenda Arsenal lakini pia Cesc Fabregas kwenda Chelsea kimewashangaza wengi lakini huo ndio ukweli.

Katika hili Mourinho wala hakupuuzia, Pauni Milioni 30 zilitosha kabisa kumhamisha makazi Fabregas kutoka Nou Camp kwenda Stamford Bridge na kwa kiasi kikubwa amekuwa bingwa wa kutoa pasi za mwisho ‘assists’ zenye tija kwa The Blues.

6.       Ander Herrera

Hii ni mashine nyingine ya ‘Man U’ iliyosajiliwa kutoka katika klabu ya Atletic Bilbao na hata kuongeza nguvu katika kikosi kilichokuwa ‘mdebwedo’ msimu uliopita. Uhamisho wake umegharimu kitita cha Pauni Milioni 29 na tayari amekwishaanza kuonekana kuwa msaada katika maskani yake mapya ya Old Trafford.

      

7.       Romeru Lukaku

Aliungana na Samuel Etoo’ kusema kwaheri kunako klabu ya Chelsea na hata kuanza maisha mapya katika maskani ya klabu yake mpya ya Everton huku mashabiki wa timu hiyo wakitegemea makubwa kutoka kwake.

Dau la Pauni Milioni 28 lilitolewa pasipo kuwa na kinyongo na mabosi wa klabu ya Everton  huku usajili huo ukionekana kukipa nguvu zaidi kikosi hicho kilicho katika nafasi ya 12 kwa sasa baada ya kucheza michezo 26 huku ikijikusanyia pointi 28 mpaka sasa.

8.       Adam Lallana

Jina lake si ngeni katika masikio ya mashabiki wengi wa soka hususan mashabiki wa EPL. Kwa kipindi chote alichoitumikia Southampton, mwanandinga huyo amekuwa kila kitu ndani ya kikosi hicho na hata kuwa sehemu ya kufanya vema kwa timu hiyo katika mechi za msimu uliopita.

Majoogoo wa Jiji, klabu ya Liverpool wala hawakufanya masihara katika zoezi zima la kuinasa saini ya mpambanaji huyu. Kitita cha pauni Milioni 25 kimempeleka pale Anfield na kutengeneza kikosi chenye mafundi wengi kama akina Gerald, Balloteli, Henderson, na wengineo.

9.       Dejan Lovren

Ni kama kusema Liverpool wameamua kukibomoa kikosi cha Southmpton baada ya kuwachukua wachezaji wengi kutoka klabuni hapo.

Dejan Lovren si maarufu hivi kwa mtu ambaye hafuatilia mchezo wa soka lakini kwa wale wenzangu na mimi ambao ulevi wetu mkubwa ni soka ni lazima wataniungana mkono kuwa Liverpool imepata Jembe ndio maana haikusita kutenga Pauni Milioni 20 na kumjumuisha kundini mwanandinga huyu asiye na jina katika EPL.

10.   Lazar Markovic

Orodha ya wachezaji waliotikisa katika usajili wa Msimu Mpya wa Ligi ya EPL inatamatika kwa mtalaamu huyu. Pengine ninaweza nikapata maswali mengi ya kwanini sijamjumuisha katika orodha hii mchezaji kama Mario Ballotelli wa Liverpool au Danny Welbeck wa Arsenal.

Unajua kwanini? Tazama thamani ya usajili wao lakini pia linganisha usajili huo na wanasoka hawa niliowaainisha katika makala yangu haya.

Klabu ya Liverpool imemsajili Lazar Markovic kutoka Benfica kwa dau nono la Pauni Milioni 20 na hata kuzidi kuongeza nguvu katika kikosi hicho cha Anfield. Hapana shaka atakuwa msaada mkubwa kwa Majogoo hao wa Jiji ambao Msimu uliopita almanusura watwae ubingwa wa EPL.

Tamati natamatika…….

(0767 57 32 87 au [email protected].